Бүгүн, 10-сентябрда, Кыргызстандын футбол боюнча Улуттук курама командасы өзбекстандык футболчуларды өз үйүндө кабыл алат. Бишкек шаарындагы Д.Өмүрзаков атындагы жаңыланган борбордук стадиондо боло турган бул беттеш 2026-жылкы Дүйнө чемпионатынын үчүнчү тандап алуу раунду алкагында өтөт.
Оюн Кыргызстандын сааты менен 20:00дө башталат. Аны УТРК Спорт телеканалы түз алып көрсөтөт.
Эки мамлекеттин футболчулары буга чейин жолдоштук беттеште: 6 жолу, ал эми Дүйнөлүк чемпионатка тандап алуу турларынын алкагында расмий 2 жолу, жалпысынан 8 ирет беттеш өткөрүшкөн. Анын баарында Өзбекстандын курамасы жеңишке жеткен. Бул оюндардын биринде, тактап айтканда, 2007-жылы май айында, “Ак шумкарлар” 6:0 эсебинде ири эсеп менен жеңилүү ызасын тарткан. Сегиз жолку беттештерде Кыргызстан 3 жолу, ал эми Өзбекстан 31 жолу гол жараткан.
Бирок, футбол серепчилери кыргызстандык оюнчулардын акыркы жылдардагы ийгиликтери – бүгүнкү оюнда өз таасирин көрсөтө турганын айтышат. Анткени Азиядагы эң күчтүү делген Ирандын футболчулары менен беттеште минималдык жеңилүү (Иран 1:0 Кыргызстан) “Ак шумкарлардын” тажырыйбасы өскөнүн көрсөткөнүн белгилешет. Мисалы, дарбазачы Эржан Токотаев, чабуулчу Жоэл Кожо, Гүлжигит Алыкулов, Кай Мерк, коргоочу Валерий Кичин, Християн Браузман, Александр Мищенко сыяктуу оюнчулар кыргыз футболун алга жылдырып жатышат.
Бүгүнкү атаандаштар да оңой эмес. Аларда Элдор Шамуродов, Аббосбек Файзуллаев, Жалолидин Машариповдор Өзбекстандын футбол жылдыздары экенин далилдеп, көптөгөн ийгиликтерди жаратып келишет.
Өзбекстан менен болгон беттештен кийин, тагыраагы, 10-октябрда “Ак шумкарлар” Катардын Улуттук курамасы менен конокто беттешет. Ал эми 15-октябрда Түндүк Кореянын футболчуларын өз үйүбүздө кабыл алабыз.
Мындан сырткары, кыргыз футболчулары 14-ноябрда БАЭ менен конокто беттеш өткөрсө, 19-ноябрда Иранды Бишкекте кабыл алат. Ошону менен 2024-жылдагы оюндар жыйынтыкталат.



















