Түркиянын президенти Режеп Тайып Эрдоган өлкөнүн ар кайсы аймактарында кургакчылык коркунучу тууралуу кабарлардан улам бүткүл адамзатты жана түрк элин сууну үнөмдүү падаланууга чакырды.
«Бүткүл адамзатты, ошондой эле түрк жарандарын сууну үнөмдүү пайдаланууга чакырам», – деди Эрдоган өкмөт жыйынынан кийин элге кайрылуусунда.
Стамбулду суу менен камсыз кылган суу сактагычтардагы суунун запасы эки айга гана калганын, кургакчылык улана берсе, абал курчуй турганын буга чейин NTV телеканалы маалымдаган.
Стамбулдун Суу ресурстары жана канализация башкармалыгынын (İSKİ) маалыматы боюнча, 16-августка карата Стамбулдагы суу сактагычтардын толуу деңгээли 33,37%ды (289 миллион кубометрден ашат) түзгөн.
Орто эсеп менен акыркы эки жумада шаарда суткасына 3 миллиондон 3,5 миллион кубометрге чейин суу керектелген. Ушундай эле коркунуч Измир курортунда да бар.
Ошол эле учурда эки жуманын ичинде суунун деңгээли 4%дан ашык азайган. Ведомство тараткан маалыматка караганда, 2014-жылы гана ушул эле мезгилде суу сактагычтар 17%га толуп, кийинки сегиз жылда 52%дан түшкөн эмес. Өткөн жылдын август айында суу сактагычтар 62%га толгон.
İSKİ билдиргендей, эң ири 10 суу сактагычтын жарымында суу тартылып кетип, 2%дан азыраак толгон. Учурда суу запастарынын 80%дан ашыгы 3 суу сактагычта – Омерли, Дарлык жана Теркос суу сактагычында.


















