Эмгек, социалдык камсыздоо жана миграция министрлиги «ачка калбайлы деп, иттин этин жейбиз» деген үй-бүлө боюнча үн катты.
Ведомствонун басма сөз кызматы маалымдагандай, Апышевдердин үй-бүлөсү Жалал-Абад облусунун Токтогул районунан Бишкекке көчүп келип, ижарага алынган батирде жашайт. Үй-бүлө башчысы ар кандай жумуштарда иштеп жан багат.
Бул үй-бүлө Бишкек шаарынын Свердлов райондук Эмгек, социалдык камсыздоо жана миграция башкармалыгынын турмуштук оор кырдаалда турган каттоосунда турат.
Башкармалыктын кызматкерлери тарабынан эки бала орто мектепке, кичүүсү бала бакчага аныкталды.
“Балдардын энесине 15 000 сом айлык акы менен жумуш сунушталган, бирок ал баш тарткан. Ошондой эле атасы жумушка орношуудан баш тарткан”, – деп билдирет министрлик.
Министрликтин маалыматына караганда, гуманитардык жардамдын алкагында үй-бүлөгө муздаткыч, кир жуугуч машина, телевизор, термопот берилип, коңшулары үй-бүлө үчүн 590 000 сом чогултушкан.
Эске салсак, буга чейин жардамга муктаж үй-бүлө тууралуу видео материал SuperTV`га чыккан. Анда жубайлар иштөөгө ден соолугу жол бербей турганын айтышып, «ачка калбайлы деп, иттин этин жейбиз» дешип, кайрымдуу элден жардам сураган.
Үй-бүлөгө алгачкылардан болуп эстрада ырчысы Айгерим Расул кызы жардам көрсөткөн.
Президенттин иш башкаруучусу Каныбек Туманбаев үй-бүлөдөн кабар алып, акчалай жардам бергени да маалымдалган.
