Кыргызстандык белгилүү хафиз Мухаммадали Умаровго унаа белек кылынды.
Умаров 2022-жылдын 22-сентябрында Сауд Аравиянын Мекке шаарында Бүткүл дүйнөлүк Куран окуу жана Куран тафсири боюнча мелдештин жеңүүчүсү болуп, баш байгеге коюлган 250 миң риалды (5.4 миллион сом) утуп алган. Ал эми ушул жылдын 4-12 ноябрында Катардын Доха шаарында өткөн “Ауаль Аль-Ауаиль” (Биринчилердин биринчиси) аталышындагы дүйнөлүк Куран жарышта мыкты 10 карынын катарын толуктаган.
“Умма” ислам журналы маалымдагандай, жеке ишкер Тилек Рыскулбеков илим-билими менен кыргыз элин дүйнөгө тааныткан инсандар колдоого жана сыйга татыктуу экендигин билдирип, соцтармактагы баракчасына пост жарыялаган.
Анын максаты Мухаммадали Умаровдой дүйнөлүк деңгээлдеги карыларга да олимпиада чемпиондоруна кылынгандай мамиле жасалып, материалдык колдоо көрсөтүү зарыл дегенди коомго жеткирүү болчу.
Ишкер хафизге машина алып берүү үчүн каражат чогулта баштаган. Көп өтпөй, өзүн жарыялагысы келбеген кайрымдуу бир инсан Мухаммадалиге унаа белек кылып, кубанычка бөлөдү.
Мухаммадали Умаров өз баракчасынан ыраазычылык билдирип, видео киргизип, мындай деди: “Адамдарга рахмат айтпаган Аллахка да рахмат айтпайт. Бул белекти көргөндө аябай толкундандык. Бизди кандай кубандырган болсо, акыретте аны Аллах эки эсе кубандырсын”.
Кыргызстандык белгилүү хафиз Мухаммадали Умаров ушул жылдын 4-12 ноябры Катардын Доха шаарында өткөн “Ауаль Аль-Ауаиль” (Биринчилердин биринчиси) аталышындагы дүйнөлүк Куран жарышта мыкты 10 карынын катарын толуктады.



















