Америка компаниялары 1 күндө 2 триллион доллар базар наркын жоготту! Мунун ичинен эң чоң соккуну Nvidia алды – бир күндө 600 млрд доллар жоготуу менен жаңы тарых жаратты.
Эмне үчүн? Себеби – DeepSeek деген кытайлык стартап! Болгону 200 адамдан турган командасы жана 6 миллион долларлык бюджети менен, алар жасалма интеллект чөйрөсүндө төңкөрүш жасады. Алардын DeepSeek-R1 модели азыркы ChatGPT, Gemini, жана CoPilot’ден дагы жакшы натыйжа берип жатат!
DeepSeek эмнеси менен айырмаланат?
• Жасалган модели Open-Source, башкача айтканда, аны ар бир адам колдонуп, өнүктүрүп, ыңгайлаштыра алат.
• Болгону 6 миллион доллар коротуп, дүйнөнү таң калтырган технология жаратты.
Финансылык берген зыяны:
• Nvidia: Бир күндө 600 млрд доллар базар наркын жоготту.
• Microsoft: Базар наркы 200 млрд долларга төмөндөдү.
• Google: Базар наркы 100 млрд долларга төмөндөдү.
• Amazon: Базар наркы 75 млрд долларга төмөндөдү.
Бул компаниялардын баарынын жоготууларынын негизги себеби – DeepSeek компаниясынын жасалма интеллект тармагында күтүлбөгөн ийгиликтери болду.
Бул эмне үчүн маанилүү?
• Кытайдын AI тармагында глобалдык лидер болуу мүмкүнчүлүгү күч алды. Америкага жаңы атандаш пайда болду.
• Open-Source моделдердин көбөйүшү менен AI технологиялары аркылуу дүйнөлүк тең салмактуулук өзгөрүүдө.
АКШ президенти Дональд Трамп бул окуяны “Америка индустриялары үчүн ойгонуу сигналы” деп атады. Аз акчага дагы эффективдүү жасаса болот турбайбы -деген сигналды Силикон өрөөнүндөгү компанияларга айтып өттү.
OpenAI дын жетекчиси Сем Алтмен дагы “DeepSeek абдан таасирдүү модел, бизге жаңы атаандаш пайда болду”,- деп белгиледи.
Акыркы учурларда жасалма интеллектке абдан көп суммадагы каражат инвестиция жасалып жаткан. Өткөн жумада эле Open AI бир канча компаниялар менен биргеликте 500 млрд долларды чапчыган Stargate долбоорун ачыктаган эле. Эми бул долбоорго инвесторлор кайтадан ойлонуп чыгышат.
Негизи эле Nvidia жасалма интеллект тармагында теңдешсиз компания- деп айта башташты эле, кытайлык стартап бул тенденцияны өзгөртүп жиберди.
Ал эми алдыда дагы саясий чечимдер болушу мүмкүн, ТикTok сыяктуу бул компанияны дагы көптөгөн саясий кыйынчылыктар күтүп турушу мүмкүн. Бирок эмнеси болсо дагы, кичинекей команда менен дүйнөлүк дөө-шааларды солкулдата тургандыгы даги бир жолу тастыкталды. Алдыда кызыктуу күндөр күтүп жатат.



















