2026-жылкы Дүйнө чемпионаты Мехикодо Мексика менен Түштүк Африканын беттеши менен старт алды. Ачылыш аземи жана биринчи беттеш кандай өттү?
Футбол боюнча 2026-жылкы дүйнө чемпионатынын ачылыш аземи Мексикадагы «Ацтека» стадионунда өттү.

Сахнага Латын Америкасынын белгилүү жылдыздары чыгышты. Алардын катарында Алехандро Фернандес, Belinda, J Balvin, Danny Ocean, Лила Даунс, группа Maná, Los Ángeles Azules жана түштүк африкалык ырчы Tyla болду.

Колумбиялык ырчы Шакира менен нигериялык аткаруучу Burna Boy турнирдин расмий гимни болгон Dai Dai чыгармасын аткарышты.

Ачылыш аземинин экинчи бөлүгүн белгилүү актриса Сальма Хайек ачып берди.
Италиялык опера ырчысы Андреа Бочелли жана кореялык-америкалык ырчы Иджей (Ejae) дүйнө чемпионатынын расмий ыры болгон DNA («ДНК») чыгармасын аткарышты. Бул ырдын жаздыруусуна ошондой эле ырчы Меган Ти Сталлион менен дүйнөгө белгилүү диджей Давид Гетта катышкан.

ДЧ-2026 Мексика менен Түштүк Африканын улуттук курамаларынын беттеши менен башталды. Бул эки команда 2010-жылы да Түштүк Африканын Йоханнесбург шаарында өткөн дүйнө чемпионатын ачышкан. Андагы оюн 1:1 эсебинде аяктаган эле.
2026-жылкы дүйнө чемпионатынын алгачкы голу беттештин тогузунчу мүнөтүндө киргизилди. Саудиялык «Аль-Кадисиянын» жана Мексиканын чабуулчусу Хулиан Киньонес атаандаштын олуттуу катасынан кийин айып аянтчасынын четинен топту алып, биринчи голду киргизди.

Биринчи тайм талаа ээлеринин 1:0 эсебиндеги артыкчылыгы менен жыйынтыкталды.
Экинчи тайм башталгандан көп өтпөй Түштүк Африканын жарым коргоочусу Яя Ситхоле эреже бузгандыгы үчүн кызыл карточка алып, талаадан четтетилди.

Оюндун 67-мүнөтүндө Рауль Хименес топту башы менен багыттап, атаандаштын дарбазасына таамай киргизди. Бул гол Хименес үчүн дүйнө чемпионаттарындагы улуттук кураманын катарындагы алгачкы гол болуп калды.
83-мүнөттө түштүк африкалыктар дагы бир кызыл карточка алышты. Бул жолу атаандашынын бетине кол сермегени үчүн Тхемба Зване оюндан четтетилди.

Кошумча убакытта калыс беттештеги үчүнчү кызыл карточканы көрсөттү. Бул жолу Мексиканын курама командасынын капитаны жана «Локомотив» клубунун коргоочусу Сесар Монтес оюн талаасынан чыгарылды.
Үч жолу оюнчулар четтетилген беттеш 2:0 эсебинде Мексиканын жеңиши менен аяктады.

Беттешти жалпы 80 миң 824 күйөрман көрдү.

















