Израилдин сентябрдын аягында ливандык “Хезболла” кыймылына каршы аскердик операциясы башталгандан бери Ливандан кеминде 440 миң качкын чыгып кетти.
Бул тууралуу БУУнун Ливандагы гуманитардык иштерди координациялоо башкармалыгынын өкүлчүлүгү билдирди.
Докладда белгиленгендей, БУУнун Качкындар боюнча Жогорку комиссарлыгынын жана Сириянын Кызыл Жарым Ай коомунун маалыматы боюнча, 23-сентябрдан бери Ливандан Сирияга 440 миңдей адам өткөн.
Документте ошондой эле Иракка дагы 22 миң ливандык киргени белгиленген.
23-сентябрда Израиль Ливандагы “Хезболла” күчтөрүнө каршы “Түндүктүн жебелери” аскердик операциясын баштап, өлкөгө массалык сокку урууда. 1-октябрда Израиль Ливандын түштүгүндө “Хезболлага” каршы кургактан операция баштаганын жарыялап, коңшу өлкөнү абадан жана кургактан бомбалоону улантууда.
Ливандын Саламаттыкты сактоо министрлигинин маалыматына караганда, 2023-жылдын октябрында аскердик эскалация башталгандан бери 2672 киши каза болуп, жарадар болгондор 12468ге жетти.
Акыркы бир сутка ичинде эле Израилдин аскер-аба күчтөрү Ливандын түндүк-чыгышында 20га жакын калктуу конуштарга чабуул коюшту. Al Jadeed телеканалы аба соккуларынан кеминде 60 адам каза таап, 100гө жакыны жарадар болгонун кабарлады.
Курмандыктардын көбү Будай, Рам, Эль-Алляк жана Эль-Хафир конуштарында катталган.
Буга чейин Бириккен Улуттар Уюмунун Качкындар боюнча Жогорку Комиссарлыгынын Башкармалыгынын өкүлү Рула Амин Сирия өзүндөгү ондогон жылдарга созулган кризистен жапа чеккенин жана гуманитардык жардамды көбөйтпөстөн качкындардын агымына туруштук бере албастыгын айткан.



















