Бишкекте 30-январдан тарта коомдук транспортто жол кире акысы көтөрүлөт. Бул тууралуу Бишкек шаардык кеңешинин (БШК) басма сөз кызматынан билдиришти.
Маалыматка ылайык, токтомдун долбооруна БШКнын төрагасы Куванычбек Конгантиев бүгүн кол койгон. Токтом расмий жарыяланган учурдан тартып 15 күн өткөндөн кийин күчүнө кирет.
Ошентип, 30-январдан тарта накталай төлөм менен жол кире 20 сом, “Тулпар” картасы менен 17 сом болот. Ал эми MegaPay электрондук капчыгы менен жол акысын төлөө мурдагыдай эле 11 сом болот.
Жеке автобустар менен кичи автобустарда тариф 20 сом деп белгиленген.
Бишкекте жол кире 15-январдан тартып көтөрүлмөк, бирок тарифти жогорулатуу токтомуна эс алуу күндөрүнө байланыштуу кол коюу процедурасы бүтпөй калып, жол кире акысын көтөрүүнүн мөөнөтү узартылган.
Эске салсак, буга чейин Бишкектин мэри Айбек Жунушалиев жол кирени көтөрбөсө жаңы сатылып алынган автобустарды жоготуп алуу коркунучу турганын айткан.
Азыркы учурда борбордо кичи автобустардын жол киреси 15 сом, ал эми автобус менен троллейбуста 11 сом.



















