Бишкекте дагы бир Жылуулук электр борборун куруу пландалууда. Бул тууралуу энергетика министринин орун басары Таалайбек Байгазиев 4-мартта маалымат жыйынында билдирди.
Анын айтымында, бул долбоорду иштеп чыгуу былтыр эле башталган, азыркы учурда долбоорго кол коюу алдында турат.
«Аталган жылуулук борбору Бишкекте көп жылдан бери иштебей турган «Айыл чарба машина куруу заводу» деген котельныйдын ордуна курулат. Ал болжол менен 100 МВт электр жана 200-300 МВт жылуулук кубаттуулукта болмокчу. ЖЭБ борбор калаанын батыш тарабындагы жылуулук алган керектөөчүлөрдү камсыздайт», — деди ал.
Ошондой эле министрдин орун басары Бишкектин четиндеги Селекция айылында жайгашкан ЖЭБ-2ни ишке киргизүү боюнча дагы бир чоң долбоор пландалып жатканын айтты.
«Учурда долбоорду ишке ашырууга инвесторлор чыгууда. Анын кубаттуулугу болжол менен 110 МВТ электр энергиясын, 170 МВТ жылуулукту түзөт», — деди Байгазиев.
Белгилей кетүүчү жагдай, 2018-жылы 26-январда катуу суукта ЖЭБде чоң авария болуп, Бишкек бир нече күн бою жылуулуксуз, бир топ жери жарыксыз калган. Ошондон кийин ишкананы оңдош үчүн ага чейинки бийликтин тушунда Кытайдын “Эксимбанкынан” алынган 386 миллион доллар насыянын бир тобу кымырылып кеткени ачыкка чыккан. Бул боюнча кылмыш иши козголуп, бир нече аткаминер камакка алынып, жоопко тартылган.
Ал эми үстүбүздөгү жылдын 2-февралында таңкы саат үчтөр чамасында ЖЭБде жарылуу болуп, беш адам Бишкектеги Тез жардам борборуна түшкөн. Алардын экөөнүн абалы оор болгондуктан жандандыруу бөлүмүнө жаткырылып, абалы оор эки кызматкер Түркияга дарыланууга жөнөтүлгөн. Мындан тышкары ЖЭБдин 8 миң чарчы метр чатыры жарактан чыккан.
Президент Садыр Жапаров “Кабар” агенттигине берген маегинде бул жарылуунун бир себеби Казакстандын Шабыркул көмүрүн каттуу жаккандан болушу мүмкүн экендигин билдирген. Кырсыктын себебин аныктоо үчүн жергиликтүү адистерден турган мекемелер аралык комиссия түзүлүп, андан тышкары Россиядан да алты атайын адис келген.












