Американын экс-президенти Жо Байдендин айтымында, бүткүл америкалыктар Миннесота штатынын тургундары сыяктуу адилетсиздикке каршы чыгышы керек. Январь айында бул штатта ICE (Иммиграция жана бажы кызматы) агенттери эки адамды атып өлтүргөн. 8-январдагы биринчи өлтүрүүдөн кийин Миннеаполисте массалык нааразылык акциялары башталган.
АКШнын мурдагы президенти Жо Байден ICE (Иммиграция жана бажы кызматы) айланасындагы жаңжалга байланыштуу «бүт Американы» Миннесота штатынын тургундары сыяктуу «тургула да үн каткыла» деп чакырды. Бул тууралуу ал X социалдык тармагындагы баракчасында жазды.
Январь айынын башында рейддердин биринде ICE агенти Миннеаполистин 37 жаштагы тургуну Рене Макклин Гудду атып өлтүргөн. Андан кийин шаарда массалык нааразылык акциялары башталган. АКШ президентинин администрациясындагы расмий өкүлдөр офицер өзүн коргогон деп билдиришүүдө.
АКШнын экс-президенти болгон окуя америкалыктардын негизги баалуулуктарына каршы келерин айтты.
«Биз өз жарандарын көчөдө атып салган улут эмеспиз», — деп белгиледи ал.
Анын айтымында, Миннесота штатынын тургундары адилетсиздикке каршы чыгуу менен бекемдикти жана жарандык позицияны көрсөтүштү.
«Америка эмнеге туруштук берип, эмнеге ишенерин эч ким жок кыла албайт — атүгүл президент да эмес, эгерде биз, бүт Америка, ордубуздан туруп үн катсак. Биз ким экенибизди билебиз», — деп чакырык жасады Байден.
Ал эки америкалык жаранды атып өлтүрүү боюнча адилеттүү иликтөө жүргүзүүнү талап кылды.
Январь айынын башындагы биринчи окуядан кийин ICE агенттери Миннеаполисте дагы бир адамды атып өлтүргөн. 24-январда 37 жаштагы медайым Алекс Джеффри Претти каза болгон. АКШнын Ички коопсуздук министрлиги алардын маалыматына ылайык, маркум куралчан болгонун билдирген, бирок видеожазууларда Преттинин колунда тапанча эмес, уюлдук телефон болгону көрүнгөн. Ал кызматкерлерге жакындаганда алар аны жерге жыгып, андан кийин ага кеминде он жолу ок чыгарган.
Бул окуялардын фонунда АКШнын президенти Дональд Трамптын ишмердүүлүгүнө колдоо көрсөткөндөрдүн жалпы рейтинги 38%га чейин төмөндөдү — бул анын азыркы мөөнөтүндөгү эң төмөнкү көрсөткүч. Сурамжылоо жума күнүнөн жекшембиге чейин жүргүзүлүп, ишемби күнү ICE кызматкерлери Миннеаполисте АКШнын экинчи жаранын атып өлтүргөнгө чейин жана андан кийин алынган жоопторду камтыган.
Рейтингдин төмөндөшү администрациянын иммиграциялык саясатына америкалыктардын нааразычылыгы менен байланыштуу.


















