Түркиянын коопсуздук күчтөрү өлкөнүн 18 провинциясында “Күрттөрдүн жумушчу партиясына” (ПКК) каршы операция жүргүзүп, 90дой шектүүнү кармады, деп жазат Yeni Şafak гезити.
«Улуттук чалгындоо уюму (MİT) жана коопсуздук күчтөрү сепаратисттик террордук уюм ПККга каршы борбору Шанлыурфа болгон 18 провинцияда «Спящая ячейка» операциясын баштады. Операциянын алкагында 90го жакын шектүү кармалды»,-деп жазат басылма.
Жекшемби күнү эртең менен Анкарада Ички иштер министрлигинин жанында теракт жасоо аракети болуп, бир террорчу өзүн жардырып, экинчиси полиция тарабынан атып өлтүрүлгөн.
Окуядан эки полиция кызматкери жараат алган. Ошол эле күнү теракт жасоо аракети болгон жерден дээрлик 10 килограммдай курал-жарактар, анын ичинде гексоген камтыган 9,7 килограмм С4 үлгүсүндөгү жардыргыч зат, үч колго жасалган граната, 1 танкка каршы колдонулган гранатомет (РПГ), үнсүз Glock тапанчасы, Blow тапанчасы, М4 карабини жана АК-47 автоматы табылган.
A Haber телеканалы кабарлагандай, террордук чабуул аракети үчүн жоопкерчиликти Түркияда тыюу салынган ПКК тобу өзүнө алган. Бул окуялардан кийин Түркиянын Улуттук Коргоо министрлиги Ирактын түндүгүндөгү ПКК согушкерлеринин буталарына абадан сокку урулганын жана согушкерлердин жыйырмадай объектилери жок кылынганын билдирди.
