АКШнын Жогорку соту президент Дональд Трамп улуттук масштабдагы өзгөчө кырдаалдар үчүн каралган федералдык мыйзамдын негизинде киргизген тарифтерге каршы чечим чыгарды. Бул тууралуу Reuters агенттиги кабарлады.
Сот Трамп соода пошлиналарын киргизүүдө өз ыйгарым укуктарынан ашып кеткенин белгиледи.
Bloomberg агенттигинин баамында, бул чечим Трамп Ак үйгө кайтып келгенден берки «эң ири укуктук жеңилүүсү» болду.
АКШнын Конституциясына ылайык, импорттук тарифтерди белгилөө боюнча өзгөчө укук Конгресске берилген. Бирок Дональд Трамп мыйзам чыгаруучу бийликтин макулдугусуз эле пошлина киргизе аларын бир нече жолу билдирип келген. Ал 1977-жылдагы Эл аралык өзгөчө экономикалык ыйгарым укуктар жөнүндө мыйзамга (IEEPA) таянган. Бул мыйзам президентке өзгөчө абал жарыялангандан кийин экономикалык операцияларды, анын ичинде чет өлкөлүк товарлардын импортун «жөнгө салууга» мүмкүнчүлүк берет.
Жогорку сот Трамп айрым тарифтерди киргизүүдө аталган мыйзамды колдонуу менен ыйгарым укуктарынан ашкан деп тапты. Чечим дүйнөнүн көпчүлүк өлкөлөрүнө каршы «өз ара» пошлиналарга, Кытай, Канада жана Мексикадан келген товарларга фентанил аткезчилигине каршы күрөш деген жүйө менен киргизилген тарифтерге, ошондой эле Орусиянын мунайын сатып алганы үчүн Индияга карата киргизилген «экинчи даражадагы» пошлиналарга тиешелүү.
Ошол эле учурда соттун чечими болот жана алюминий импортуна коюлган тарифтерге жайылтылбайт, анткени алар башка мыйзамдык нормалардын негизинде киргизилген.
















