АКШнын расмий адамдары Иран менен болгон сүйлөшүүлөрдүн жүрүшүндө Израиль Тегерандын башкы сүйлөшүүчүлөрү — Ирандын тышкы иштер министри Аббас Арагчи менен парламенттин төрагасы Мохаммад Галибафка кол салууну пландап жатат деп шектенишкен. Бул тууралуу The New York Times басылмасы өз булактарына таянып жазды.
Басылманын маалыматына ылайык, Ирандын жетекчилерин жок кылуу Израилдин жаңжал башталгандан берки стратегиясынын бир бөлүгү болгон. Бирок сүйлөшүүлөр жүрүп жаткан маалда АКШ мындай кол салуу болушу мүмкүн деген кооптонуусун күчөткөн. The New York Times басылмасынын булактары билдиргендей, ушул себептен улам Вашингтон коопсуздук чараларын күчөтүү максатында Тегеранды мүмкүн болгон кол салуу тууралуу алдын ала эскерткен.
Аббас Арагчи менен Мохаммад Галибаф ок атышууну токтотуу жана АКШ менен тынчтык келишимин түзүү боюнча сүйлөшүүлөрдү жүргүзгөн негизги өкүлдөр болушкан.
Апрель айында Галибаф АКШнын вице-президенти Жей Ди Вэнс менен жолугушуусу керек болчу. Бирок ирандык расмий өкүлдөр мүмкүн болгон кол салуудан кооптонуп, ортомчулар аркылуу АКШдан Израиль мындай операцияларды жүргүзбөй турганына кепилдик берүүнү суранышкан.
Жыйынтыгында, сүйлөшүүгө бара жатканда жана кайтып келе жатканда Ирандын учагын Пакистандын аскердик учактары коштоп жүргөн. The New York Times басылмасынын булактарынын айтымында, кайтып келе жаткан учурда Израилдин мүмкүн болгон чабуул коркунучу жаралып, учак аргасыздан конууга мажбур болгон. Андан кийин делегация сапарын кургактык аркылуу уланткан.

















