Президент Дональд Трамптын администрациясы Гарвард университетине чет элдик студенттерди кабыл алууга жана окутууга «тиешелүү мыйзамдарга туура келбейт» деген жүйө менен тыюу салып, АКШнын ички коопсуздук министри Кристи Ноэмдин көрсөтмөсү боюнча студент алмашуу программасынын аккредитациясын жокко чыгарды.
Министр Кристи Ноэм Гарвард университетине кат жөнөтүп, бул чечим тууралуу окуу жай менен кабарлашканын X социалдык тармагында жарыяланган билдирүүсүнө таянып Ведомости.ру басылмасы жарыялады.
«Мен бүгүндөн тарта Гарвард университетинин студент алмашуу программасынын сертификаты жокко чыгарылгандыгын билдиргим келет»,- деди Ноэм.
Ал аккредитацияны жокко чыгаруу Гарварддын 2025-2026-окуу жылына F жана J визалары боюнча эл аралык студенттерди кабыл алуусуна тоскоол болорун, эми программанын алкагында кабыл алынгандар статусун сактап калуу үчүн башка окуу жайларга которулушу керек экенин түшүндүрдү.
«Бул чечим сиз үчүн күтүлбөгөн нерсе болбошу керек жана Гарварддын жөнөкөй талаптарга жооп бербегенинин кайгылуу натыйжасы», – деп кошумчалады ал.
Анын айтымына караганда, эгерде университет жаңы окуу жылынын башталышына чейин өзүнүн программасы үчүн аккредитациядан өтүүнү кааласа, анда ал 72 сааттын ичинде бардык суралган маалыматты бериши керек.
2025-жылдын 15-апрелинде Трамптын администрациясы Гарварддын саясатын өзгөртүү жана студенттерди текшерүү талаптарын четке каккандан кийин 2,3 миллиард долларды кыскарткан.
Ноэм өз катында, 16-апрелде Гарварддан чет элдик студенттер жана мүмкүн болуучу мыйзам бузуулар тууралуу маалыматтарды сураганын, бирок 30-апрелде алган жооп толук эмес экенин баса белгилеген. Экинчи жолу маалымат берүүгө мүмкүнчүлүк болгон менен университет дагы министрликтин талаптарын толугу менен аткарган эмес.
Буга чейин Трамптын администрациясы 2,2 миллиард долларлык каржылоону жана Гарвардга берилген 60 миллион долларлык контракттын наркын тоңдурууну чечкен.
Университет федералдык өкмөт каражатты мыйзамсыз тоңдуруп жатат деген жүйө менен бул чечимге бөгөт коюу үчүн сотко кайрылган.
Гранттар жокко чыгарылгандан кийин университеттин окумуштуулары кургак учук, космоско саякат жана радиация оорусу боюнча изилдөөлөрүн токтотуп жатышканын The New York Times жазып чыкты.
Ошол эле учурда Трамп илимий долбоорлорду каржылоону кыскартып жаткан шартта Канада, Франция, Германия, Дания, Норвегия жана Австралия америкалык изилдөөчүлөрдү тартып жаткандыгын Bloomberg агенттиги жарыялады.
Эскерте кетсек, АКШнын Саламаттыкты сактоо жана калкты тейлөө министрлиги Гарвард университетинин жалпы суммасы 60 миллион долларга жакын көп жылдык гранттарын жокко чыгарууну чечкен. Буга окуу жайдын антисемитизм жана расалык дискриминация көйгөйлөрүн чече албагандыгы себеп болгон.
Ага чейин Гарвард университети мыйзамды бузду жана кадр саясатын өзгөртүүдөн баш тартты деп айыпталгандан кийин АКШда жаңы өкмөттүк гранттарды алуу укугунан ажыраган.
Кошумчалай кетсек, Гарвард университетинин студенттери Израил армиясынын Газа тилкесине кол салууларына каршы нааразылык билдиришкен. Бул акция АКШнын башка университеттерине да жайылган.
















