Афганистандын каржы системасында, башка көпчүлүк өлкөлөрдөй эле, иштен бошогон мамлекеттик кызматкерлерге пенсия төлөө тартиби ондогон жылдардан бери бар. Бирок ар бир мезгилде бул система кемчиликтер жана жетишпестиктер менен коштолуп келген. Ушундан улам өлкөдөгү ар кандай өкмөттөр мамлекеттик пенсиялык төлөмдөрдүн тартибин ирээтке келтирүүгө аракет кылышкан, бирок бул аракеттер көп учурда пенсионерлердин нааразычылыгын жаратып, мамлекеттик кызматтан чыккан жарандар ар кандай кыйынчылыктарга туш болушкан.
«Талибан» кыймылы бийликке келгенден кийин мамлекеттик кызматкерлерге пенсия берүү узак убакытка токтоп калган. Үстүбүздөгү жылдын август айынын аягында «Талибан» өкмөтүнүн Каржы министрлиги пенсионер мамлекекттик кызматкерлерге пенсия төлөмдөрүн кайра баштаганын жарыялаган.
Учурда министрлик атайын түзүлгөн графикке ылайык, өткөн жылдардагы пенсиялык карыздарды тиешелүү мекемелер жүргүзгөн текшерүүдөн кийин ай сайын төлөп берүүнү улантып келет.
Афганистанда пенсиялык система негизинен мамлекеттик сектордо иштеген кызматкерлерге багытталган. Пенсия өлчөмү кызмат өтөгөн жылдарына, кызмат даражасына жана мурдагы айлык маянасына жараша эсептелет. Өлкөдө толук жана туруктуу пенсиялык системаны модернизациялоо маселеси көп жылдан бери талкууда болуп, саясий туруксуздук жана экономикалык кыйынчылыктар анын өнүгүшүнө олуттуу таасирин тийгизип келет. Жеке сектордогу кызматкерлер үчүн жалпы улуттук пенсия фонду толук калыптана элек, ошондуктан көпчүлүк жарандар карылык мезгилинде мамлекеттик жардамга же үй-бүлөлүк колдоого таянууга аргасыз.
Ооганстанда 65 жашка чыккандар же 40 жылдык стажы барлар пенсияга чыгышат. Ыктыярдуу пенсияга чыгууда адам 55 жаштан кем эмес же 25 жыл иштеген болушу керек.


















