Орусиянын президентинин басма сөз катчысы Дмитрий Песков Кремль Владимир Путиндин Кытайга сапарына даярдык көрүп жатканын ырастады, деп билдирди орусиялык мамлекеттик маалымат каражаттары.
“Мен президент Путиндин Кытайга сапары чындап даярдалып жатканын ырастай алам”, – деди Кремлдин өкүлү шаршемби, 15-апрелде өткөн брифингде.
Анын айтымында, орус лидеринин Кытайга боло турган сапарына жогорку деңгээлдеги байланыштар даярдалууда.
“Кытай биздин өзгөчө артыкчылыктуу стратегиялык өнөктөшүбүз жана сапар жана жогорку деңгээлдеги байланыштар даярдалууда. Бул байланыштардын убактысы жөнүндө сизге өз убагында кабарлайбыз”, – деп белгиледи Песков.
Ал ошондой эле орус лидеринин Кытайга болгон сапары учурунда орус жана АКШ президенттери Владимир Путин менен Дональд Трамптын жолугушуу мүмкүнчүлүгү учурда каралбай турганын билдирди. «Учурда мындай пландар жок», – деп жооп берди ал бул маселе боюнча суроого.
Мурда маалымат каражаттарында Путиндин Кытайга сапары май айынын экинчи жарымында болору айтылган.
Февраль айында Кытайдын төрагасы Си Цзиньпин орус президентин жылдын биринчи жарымында Кытайга расмий сапар менен барууга чакырганы жарыяланган. «Чакыруу ыраазычылык менен кабыл алынды. Даталар жана чоо-жайы кошумча макулдашылат», – деп билдирди ошол учурда орус президентинин жардамчысы Юрий Ушаков журналисттерге.
Андан тышкары, Кытайдын лидери орус президентин ноябрь айында Шэньчжэньде өтө турган АТЭС саммитине катышууга чакырды, деди Ушаков. «Россия Кытайдын төрагалыгынын ишмердүүлүгүн колдойт жана албетте, биздин президент Шэньчжэньдеги жолугушууга катышууга даяр болот», – деди ал.
Шаршемби күнү, 15-апрелде, Орусиянын тышкы иштер министри Сергей Лавров Путиндин Кытайга сапары 2026-жылдын биринчи жарымында болорун жарыялады. Бээжинге сапарынан кийинки басма сөз жыйынында тышкы иштер министри эки өлкө 14-маданият аралык жылын баштаганын, бул жолу билим берүүгө арналганын эске салды. Лавров бул багыт дагы сапардын программасын иштеп чыгуунун алкагында карала турганын билдирди.
Орусиянын президенти Владимир Путин Кытайга акыркы сапарын өткөн жылдын 31-августунан 2-сентябрына чейин Кытайдын төрагасы Си Цзиньпиндин чакыруусу менен жасаган. Тяньцзинь шаарында мамлекет башчысы Шанхай кызматташтык уюмунун саммитине катышып, сөз сүйлөгөн.
2-сентябрда Пекинде Орусия, Кытай жана Монголия лидерлеринин үч тараптуу жолугушуусу болуп, анда Владимир Путин, Си Цзиньпин жана Ухнагийн Хурелсух ар кандай тармактардагы кызматташуунун негизги багыттары боюнча пикир алмашышкан.
















