АКШ президенти Дональд Трамп жума күнү, 21-ноябрда, Нью-Йорктун жаңы мэри Зоран Мамдани менен Ак үйдө жолугат.
«Нью-Йорктун мэри, коммунист Зоран “Кваме” Мамдани жолугушууну суранды. Биз бул жолугушуу жума күнү, 21-ноябрда, Сүйрү кабинетинде өткөрүүнү макулдаштык», — деп жазды Трамп Truth Social социалдык тармагында. Ал мындан тышкары: «Кошумча маалымат кийинчерээк берилет», — деп кошумчалады.
Bloomberg’дин маалыматына караганда, бул жолугушуу Мамдани шайлоодо жеңишке жеткенден кийинки Трамп менен анын алгачкы жүзмө-жүз жолугуусу болуп калат. Тараптар Ак үйдө келечектеги кызматташтык тууралуу сүйлөшмөкчү.
Нью-Йоркто ноябрдагы шайлоодо 34 жаштагы демократиялык социалист, штаттын мыйзам чыгаруу органынын мүчөсү Зоран (Зохран) Мамдани күтүүсүз жеңишке жеткен. Ал шайлоочуларга бекер жана тез жүргөн автобустарды, муниципалдык азык-түлүк дүкөндөрүнүн тармагын, жалпыга жеткиликтүү мектепке чейинки билим берүүнү жана ижарасы жөнгө салынган батирлерде жашаган 2 миллионго жакын тургун үчүн ижара акысын тоңдурууну убада кылган.
Мамдани Нью-Йорктун мэри кызматын ээлеген биринчи мусулман жана түштүк азиялык тектен чыккан саясатчы болуп саналат.
Мамданинин жеңишинен кийин Трамп: «Кечээ кечинде Нью-Йорктун бир аз суверенитетин жоготтук. Бирок биз бул маселени чечебиз. Кабатыр болбоңуздар», — деген билдирүү тараткан. Ага чейин президент социалист мэр шайланса, шаарды каржылоону кыскартарын эскерткен. Өз кезегинде Мамдани шайлоо кампаниясында Трампты «демократияга коркунуч» деп атаган.
Кийин, 18-ноябрда, жаңы шайланган мэр Мамдани Трамп менен жолугушуу боюнча сүйлөшүүлөр жүрүп жатканын билдирген. «Менин командам Нью-Йорк тургундарына берген убадамды аткаруу үчүн Ак үйгө кайрылды», — деген Мамдани.


















