Хуситтердин дрону Израилдин Эйлат шаарындагы мейманканага урунду.
Йемендик хуситтер учуруп жиберген дрон бейшемби күнү кечинде Израилдин Эйлат шаарындагы мейманкананын кире беришине сокку урду. Бул тууралуу Times of Israel билдирди.
Бийликтин маалыматы боюнча, мейманкананын имараты зыянга учурады, бирок эч ким жабыркаган жок.
«Полиция кызматкерлери кулаган жерди курчоого алды, жардыруучу заттарды зыянсыздандыруу боюнча адистер объектти аныктап, анын сыныктарын алып чыгуу менен алектенип жатышат. Кулаган жер тууралуу кабар келген аймакта издөө-куткаруу топтору иштеп жатышат», — деп айтылат Израил полициясынын билдирүүсүндө.
Аскерлер дронду эмне үчүн кармай албай калышканын иликтеп жатышат.
Бир сааттан кийин экинчи дрон кармалды. Мындан тышкары, хуситтер Израилге ракета аткылашты — ал Израилдин абадан коргонуу күчтөрү тарабынан атып түшүрүлдү.
2025-жылдын 7-июлунда Израил «Кара туу» операциясын баштаган, анын максаты йемендик хуситтердин «Ансар Аллах» кыймылын талкалоо болгон. Август айында Израилдин премьер-министри Биньямин Нетаньяху кыймылдын өкмөтүнүн көпчүлүк бөлүгү жок кылынганын билдирген.
Буга чейин Йемен портунда Израилдин соккусунан кийин чоң өрт чыккан.


















