Казакстандын дан экспорту бир жыл ичинде 55 пайызга өсүп, 9,8 миллион тоннадан ашты. Бул тууралуу Казакстан айыл чарба министрлигинин басма сөз кызматы билдирди.
«”Қазақстан темір жолы” улуттук компаниясынын маалыматына ылайык, 2024-жылдын сентябрынан 2025-жылдын 10-августуна чейинки мезгилде экспорт көлөмү 9,8 миллион тоннаны түздү. Бул көрсөткүч 2023–2024-жылдагы ушул эле мезгилдегиден 55 пайызга жогору», — деп айтылат билдирүүдө.
Маалыматта белгиленгендей, жеткирүүлөрдүн көлөмүнүн олуттуу өсүшү казакстандык данга тышкы рыноктордо жогору суроо-талап бар экенин айгинелейт.
Министрлик негизги багыттар боюнча көрсөткүчтөрдү келтирди:
Казакстандан Өзбекстанга дан экспорту 34,4 пайызга өсүп, 2,75 млн тоннанын ордуна 3,7 млн тоннаны түздү.
Тажикстанга жеткирүүлөр 46 пайызга көбөйүп, былтыркы 960 миң тоннанын ордуна 1,4 млн тоннаны түздү.
Афганистанга экспорт 51,6 пайызга өсүп, 217 миң тоннанын ордуна 329 миң тоннаны түздү.
Кыргызстанга жеткирүүлөр эки эсеге көбөйүп, 131 миң тоннанын ордуна 262 миң тонна болду.
Иранга экспорт 16 эсеге өсүп, өткөн жылдагы 61 миң тоннанын ордуна 974 миң тонна болду.
Азербайжанга жеткирүүлөр 121 эсеге көбөйүп, 6 миң тоннанын ордуна 728 миң тонна болду.
Эске салсак, 2024-жылы Казакстанда дан жыйноо көлөмү 26,7 млн тоннаны түзүп, бул өлкө үчүн рекорддук көрсөткүч болгон. Казакстан буудайынын негизги салттуу базарлары — Борбор Азия өлкөлөрү: Өзбекстан, Тажикстан, Кыргызстан, ошондой эле Афганистан.



















