Йемендик «Ансар Аллах» кыймылы 1-июлда Израилдин аймагына ракеталык сокку жасап, Тель-Авивдеги “Бен-Гурион” аэропортун гипер үндүү ракета менен аткылашты.
Бул тууралуу хуситтердин куралдуу күчтөрүнүн өкүлү Яхья Сариа билдирди.
“Йемендин куралдуу күчтөрүнүн ракеталык бөлүктөрү оккупацияланган Яффо районундагы “Бен-Гурион” аэропортуна “Палестина-2” гиперүндүү баллистикалык ракетасын колдонуу менен аскердик операция жүргүзүштү. Операция максатына ийгиликтүү жетти”, — деди “Ансар Аллах” кыймылынын өкүлү хуситтерге таандык Al Masirah телеканалынын эфиринде.
Анын айтымында, соккудан кийин аэропорттун иши токтотулган.
Ошондой эле Сариа йемендик козголоңчулар Ашкелон, Тель-Авив жана Эйлат шаарларындагы “сезимтал объекттерге” үч учкучсуз учуучу аппарат аркылуу чабуул жасашканын кошумчалады.
Мунун алдында Израил армиясы Йеменден атылган ракета кармалганын билдирген. Өлкөнүн бир нече райондорунда ракета коркунучу тууралуу элди эскерткен аба коңгуроолору жаңырган.
Израилдин коргоо министри Исраэл Кац “Ансар Аллах” кыймылынын кезектеги ракеталык чабуулуна жооп ирээтинде аларга жаңы сокку уруларын эскертти.
2023-жылдын аягынан тарта хуситтер Израилге жүздөгөн ракеталарды жана учкучсуз учуучу аппараттарды учурушкан. Алар мындай аракетин Газа секторунда жүрүп жаткан Израилдин аскердик операциясына каршы, палестин элине болгон тилектештик катары түшүндүрүшкөн. Бул чабуулдардын көбү ракетага каршы коргонуу системалары тарабынан тосулган, бирок Израил аймагына тийген учурлар да катталган.
Буга жооп катары Израиль Йемендеги хуситтерге каршы бир катар масштабдуу аба соккуларын жасап, хуситтердин объектилери — порттор, электр станциялар, заводдор жана Сана аэропорту бутага алынган.


















