Миллиардер Илон Маск АКШнын президенти Дональд Трамптын администрациясынан кетип жатканын “Рейтер” агенттиги Ак үйгө шилтеме берүү менен тастыктады.
АКШнын Мамлекеттик башкаруунун эффективдүүлүгү департаментинин (DOGE) башчысы Илон Маск буга чейин атайын мамлекеттик кызматкер катары пландаштырылган мөөнөтү аяктап баратканын айтып, АКШ президенти Дональд Трампка өкмөттөгү “мамлекеттик ысырапкорчулукту кыскартуу мүмкүнчүлүгү” үчүн ыраазычылык билдирген.
Рейтер агенттиги Ак үйдүн атын атабаган расмий өкүлүнө шилтеме жасап, миллиардердин кызматтан кетүү тууралуу арызын ырастап, анын кызматтан алынышы “бүгүн кечинде” (Москва убактысы боюнча жума күнү кечинде) башталарын белгиледи.
“Анын кызматтан кетиши тез жана аземсиз болду. Кырдаалды жакшы билген булактын айтымында, ал кетээрин жарыялаганга чейин Трамп менен расмий сүйлөшкөн эмес жана чечим “жогорку жетекчиликтин деңгээлинде” кабыл алынган”,- деп билдирет Рейтер.
Өткөн жумада АКШнын Өкүлдөр палатасы президент Дональд Трамп сунуштаган, салык жеңилдиктерин узартуу жана федералдык чыгымдарды кыскартууну караган кеңири мыйзам долбоорун кабыл алган. Ошондо Маск бул долбоор ири чыгымдарга багытталганын, бюджеттик дефицитти азайтуунун ордуна аны көбөйтүп, DOGE жүргүзүп жаткан иштерге тоскоол болушу мүмкүн деп, нааразычылыгын билдирген.
“Washington Post” гезитине берген маегинде Маск АКШнын бюрократиялык системасына нааразычылыгын билдирип, анын жетекчилигиндеги Мамлекеттик башкаруунун эффективдүүлүгү департаменти (DOGE) “күнөөсүз күнөлүү” болуп калганын жана ага тиешеси жок маселелер үчүн айыпталып жатканын айткан.
Буга чейин Маск Трампты активдүү колдоп, анын шайлоо кампаниясына 200 миллион доллардай каражат салган. Бирок акыркы убактарда ал президенттин саясатын бир нече жолу сындап, Tesla, SpaceX жана xAI компанияларын өнүктүрүүгө көңүл бурууну көздөп жатканын билдирген.
Трамптын администрациясында Маск “атайын мамлекеттик кызматкер” болуп иштеген. Америкалык мыйзам бул категориядагы кызматкерлерге өкмөттө “365 күндүк мөөнөттө 130 күндөн ашык эмес” иштөөгө уруксат берет. Ишкер үчүн бул мөөнөт 2025-жылдын май айынын аягында бүтөт.


















