Түркиянын Анталия шаарында «Бөлүнгөн дүйнөдөн дипломатияга кайтуу» деген темада IV Дипломатиялык форуму (ADF2025) өтүп жатканын чет элдик ЖМКлар маалымдашты.
Маалыматка ылайык, иш-чара Түркиянын Тышкы иштер министрлиги тарабынан жана өлкөнүн президенти Режеп Тайып Эрдогандын колдоосунун астында уюштурулду.
Быйыл форумга 4000ден конок, анын ичинде 140тан ашык өлкөдөн 20 мамлекет жана өкмөт башчылары катышат.
Өлкөлөрдүн делегацияларынын курамында 70тен ашык министр бар. Форумга 60ка жакын жогорку деңгээлдеги эл аралык уюмдардын өкүлдөрү да катышууда.
Кечээ, 11-апрелде башталган үч күндүк иш-чарада климаттын өзгөрүшү, терроризмге каршы күрөш, гуманитардык жардам, санариптештирүү, азык-түлүк коопсуздугу жана жасалма интеллект сыяктуу глобалдык күн тартибиндеги маанилүү темалар боюнча 50дөн ашык сессия болот.
Анталияда коопсуздук күчтөрү жана МАИ кызматкерлери кирүүчү жолдорду тынымсыз күзөтүүдө.
Форумга Орусиянын тышкы иштер министри Сергей Лавров да келди.
Эске сала кетсек, бул форум 13-апрелге чейин уланат. Ага 140 ашык өлкөдөн катышууда.
Алардын арасында 20дан ашык мамлекет жана өкмөт башчылар, 74 министр, ошондой эле алардын орун басарлары жана парламентарийлери бар.
Форумду дээрлик 50 өлкөдөн 950 журналист чагылдырат.



















