Билим берүү жана илим министрлиги “Сапат” билим берүү мекемелер тармагынын “Маариф” эл аралык фондунун башкаруусуна өткөрүлүшүнө байланыштуу комментарий берип, “Сапат” билим берүү мекемелери өз иштерин улантарын билдирди.
Министрликтен билдиришкендей, “Сапат” эл аралык билим берүү мекемелер тармагын “Маариф” эл аралык фондунун башкаруусуна өткөрүү чечими кабыл алынган.
Ал эми Министрлер кабинети белгилегендей, бул чечим “Сапат” билим берүү мекемелеринин тарбиялануучуларынын, окуучуларынын, студенттеринин жана алардын ата-энелеринин кызыкчылыктарына жооп берип, алардын билим алуу шарттарын жана ар тараптуу өнүгүү келечегин жакшыртат деген ишеничте кабыл алынган.
Мындан тышкары “Маариф” эл аралык фондунун өкүлчүлүгүнөн да билдирүү болгон.
Белгиленгендей, “Сапат” эл аралык билим берүү мекемелер тармагынын “Маариф” эл аралык фондунун башкаруусуна өтүшү билим берүү мекемелеринин ишмердигин үзгүлтүккө учуратпайт.
Окутуучулар, мугалимдер жана окутуучулар мурдагыдай эле өз кесибин аркалай беришет. Тарбиялануучулар, окуучулар жана студенттер билим берүү уюмдары менен буга чейин түзүлгөн келишимдердин негизинде билим алуусун улантышат. Билим берүү процессинин ар бир катышуучусунун укуктары корголот.
Билим берүү жана илим министрлигинин жетекчилиги аталган фонддун өкүлдөрү менен жолугуп, “Сапат” билим берүү мекемелер тармагында билим берүүнүн сапатын азыркы деңгээлинен түшүрбөө, колдон келсе азыркыдан да жогору деңгээлге чыгаруу керек экендиги боюнча эки тараптуу сүйлөшүү болгондугу боюнча маалыматта айтылды.
Бирок, буга чейин “Сапат” билим берүү тармагынан билим алган бүтүрүүчүлөр менен коомчулукта аталган мекеменин “Маариф” эл аралык фондунун башкаруусуна өтүшүнө бир катар түкшүмөлдүү суроолор жаралып, нараазычылыктар менен кошо сын-пикирлер да айтылууда.
Эскерте кетсек, “Сапат” эл аралык билим берүү мекемеси бардык мүлкүн жана расмий мөөрүн түркиялык “Маариф” фондуна өткөрүп бергени 2-январда белгилүү болгон.
Аталган мекеме көп өтпөй “Мындан аркы ишмердүүлүк боюнча бардык юридикалык жоопкерчилик “Маариф” фондуна тиешелүү экендигин билдиребиз”, – деген билдирүү мекеменин социалдык тармактагы баракчасына жарыялаган.
Ал эми Юстиция министрлиги өзүнүн сайты аркылуу “Сапат” 30-декабрда кайра каттоодон өткөндүгүн, анын негиздөөчүлөрүнүн катарында “Маариф Улусларарасы Егитим Курумлары” акционердик коому жана Түркиянын “Маариф” фонду менен Кыргызстандын Билим берүү жана илим министрлиги бар экендигин билдирген.
Маалымат иретинде:
Түркиянын Билим берүү министрлигине караштуу “Маариф” фонду (Türkiye Maarif Vakfı) 2016-жылы түзүлгөн. Уюм 2021-жылы Бишкекте фонддун биринчи мектебин ачкан.
“Сапаттын” сайтындагы маалымат боюнча, билим берүү мекемесинин Кыргызстанда 16 лицейи, “Ала-Тоо” университети, 12 башталгыч мектеби бар.
Түрк бийлиги 2016-жылы диний аалым Фетхуллах Гүленге таандык деп эсептелген билим берүү мекемелеринин ишин токтотууну Кыргызстандан талап кылган. Расмий Бишкек түрк лицейлери өлкөгө эч кандай коркунуч келтирбей турганын билдирген соң эки өлкөнүн мамилеси сууй түшкөн.

















