Кремль Асаддын ажырашып кеткенин жана анын Орусиядагы активдеринин тоңдурулганын четке какты.
Орусия президентинин басма сөз катчысы Дмитрий Песков Сириянын экс-президенти Башар Асад жубайы менен ажырашып, анын мүлкү тоңдурулганы тууралуу маалымат чындыкка дал келбей турганын билдирди.
Буга чейин түрк маалымат каражаттары орус бийликтери Асаддын Москвадан чыгып кетишине жана саясий ишмердүүлүк менен алектенүүсүнө тыюу салганын, ошондой эле анын активдери менен мүлкүн тоңдурганын жазып чыгышкан.
Ошондой эле анын жубайы Асма Асад Москвадагы жашоо шартына нааразы экенин билдирип, өзү туулуп өскөн Лондонго көчүү үчүн ажырашууну талап кылганы маалымдалган. Ал Москвадан чыгып кетүүгө уруксат берүү өтүнүчү менен орус бийлигине кайрылган имиш.
Бул кабарларга комментарий берип жатып, Песков орусиялык басылмаларга алардын “чындыкка дал келбей тургандыгын” айтты.
FT гезитинин маалыматына караганда, Асаддын жубайы рак оорусунун кайталанышын Москвада күйөөсү Сириядан качып кетерден бир нече жума мурун эле дарылай баштаган. Ал 2019-жылы эмчек рагынын шишигин алып салгандан кийин 2024-жылдын май айында курч миелоиддик лейкоз деген диагноз коюлган.
8-декабрга караган түнү Дамаскка куралдуу оппозициялык топтор кирип келип, Асаддын режими кулатылганын жарыялаган. Сириянын экс-президенти өлкөдөн чыгып, Орусиядан башпаанек тапкан.
