18-декабрдан тарта Бишкек – Москва багыты боюнча жүргүнчү поезди кайрадан каттай баштады. Поезд мурда Москвадагы Казан вокзалына жетсе, эми Павелецкий вокзалына 3 күндүк жол жүрүү менен барат.
Билеттин баштапкы баасы 11 000 сомдон башталат. Каттамда 35 пайыздан 5 пайызга чейин арзандатуулар каралган. Бул арзандатуулар төмөнкү шарттарга жараша өзгөрөт:
вагондун категориясы;
билеттин сатып алуу мөөнөтү (поезд жөнөгөнгө чейин канчалык эрте сатып алынганына байланыштуу);
сапардын алыстыгы.
Каттамдын графиги:
Бишкектен чыгуучу поезд: шаршемби жана ишемби күндөрү, Москвага келүү: ишемби жана шейшемби күндөрү.
Москвадан чыгуучу поезд: жекшемби жана шаршемби күндөрү, Бишкекке келүү: шаршемби жана ишемби күндөрү.
Каттамда жалпысынан 7 вагон бар, анын ичинде:
2 купелик вагон
5 плацкарттык вагон
Билеттерди Бишкек-2, Беловодский, Кара-Балта, Кайыңды, Мерке, Ош жана Жалал-Абад бекеттеринин кассасынан алсаңыз болот.
Бишкек-Москва багыты боюнча темир жол каттамы 2020-жылы пандемиядан улам токтотулган. 4,5 жылдык тыныгуудан кийин каттам кайрадан жанданды.



















