6-ноябрда Бишкекте Түрк мамлекеттер уюмунун (ТМУ) кезектеги он биринчи Саммити өтөт. Алдыдагы Саммиттин темасы – “Түрк дүйнөсүнүн күчтөнүшү: Экономикалык интеграция, туруктуу өнүгүү, санариптик келечек жана бардыгы үчүн коопсуздук”.
Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
Саммиттин ишине Уюмга мүчө беш мамлекеттин – Түркия Республикасынын, Азербайжан Республикасынын, Казакстан Республикасынын, Кыргыз Республикасынын жана Өзбекстан Республикасынын башчылары, ошондой эле Уюмдун байкоочу өлкөлөрүнүн лидерлери катышат.
Азымбакиевдин айтымында, өлкөлөрдүн лидерлери ТМУнун алкагында көп тараптуу кызматташтыкты мындан ары өнүктүрүү маселелерин талкуулашат, Уюмдун учурдагы күн тартибиндеги актуалдуу маселелер боюнча чечимдерди кабыл алышат, ошондой эле бир катар көп тараптуу документтерге, анын ичинде Саммиттин жыйынтыктоочу Декларациясына кол коюшат.
Саммиттин жыйынтыгы боюнча 2025-жылга Түрк мамлекеттер уюмуна төрагалык кылуу Кыргыз Республикасына өтөт.
“Кыргыз Республикасынын Уюмга алдыдагы төрагалыгы мезгилинде мүчө мамлекеттердин ортосундагы байланыштарды чыңдоо, экономикалык өсүш жана региондо жашоо деңгээлин жогорулатуу үчүн жаңы мүмкүнчүлүктөрдү түзүү боюнча бир катар иш-чараларды өткөрүү пландаштырылган”, – деп билдирди Муратбек Азымбакиев.
4-5-6-ноябрь күндөрү Түрк мамлекеттер уюмунун мамлекет башчыларынын 11-саммити жана Түркия президенти Режеп Тайип Эрдогандын мамлекеттик сапары менен келгендигине байланыштуу Бишкек шаары жана Чүй облусунун айрым көчөлөрүнө маал-маалы менен чектөөлөр киргизилерин Ички иштер министринин орун басары Нурлан Исмаилов билдирди.
Чектөө киргизиле турган көчөлөр:
- “Манас” эл аралык аэропортунан Бишкек шаарына чейин;
- Фучик көчөсүнөн тартып, Чүй кең көчөсүнө чейин;
- Манас жана Фучик көчөсүнөн тартып, Чыгышты карай “Ала-Арча” мамлекеттик резиденциясына чейинки бөлүгү;
- “Ала-Арча” мамлекеттик резиденциясынан тартып, “Ата-Бейит” мемориалдык комплексине чейин.
Саммит учурунда коомдук тартипти сактоого жана жол коопсуздугун камсыз кылууга 4 миңден ашуун милиция кызматкери тартылат.



















