Израилдин күчтөрү менен ливандык “Хезболла” кыймылы бири-бирине абадан сокку урушту.
“Хезболла” бейшемби күнү таң эртеден бери Израиль армиясынын чек аранын ар кайсы аймактарындагы 17 позициясына чабуул коюшту, деп билдирди ливандык кыймылдын басма сөз кызматы.
“Ислам каршылык көрсөтүү күчтөрү Митуладагы душмандык Израилдин негизги пунктуна ракеталык чабуул жасашты”, — деп айтылат Telegram-каналдагы билдирүүдө.
Ливандык кыймылдын билдирүүлөрүнө караганда, чабуулга ошондой эле Израиль армиясынын казармалары жана израиль армиясынын чогулган жерлери да дуушар болду. Натыйжада Израилдин аскерлеринин арасында каза болгондор жана жарадар болгондор бар.
Өз кезегинде Израилдин Коргоо күчтөрү (ЦАХАЛ) Ливандын түштүгүнө жасалган бир катар чабуулдар аяктаганын жарыялады, анын жүрүшүндө “Хезболланын” 100гө ракета коё берүүчү орнотмолору жана объекттери аткыланып, талкаланганы айтылат.
19-сентябрь эртең менен Ливандын түштүгү массалык бомбаланганы, ал “Хезболланын” баш катчысы Хасан Насрулла сүйлөп жаткан учурга туш келгени кабарланган.
Израиль-Ливан чек арасындагы абал 2023-жылдын октябрында Газа тилкесинде Израилдин армиясынын аскердик операциялары башталгандан кийин курчуган. Израиль армиясы менен “Хезболла” чек ара аймагындагы бири-биринин позицияларына күн сайын ок атышууда. Ливандын Тышкы иштер министрлигинин маалыматына караганда, аткылоодон улам өлкөнүн түштүгүндө 100 миңге жакын адам үйлөрүн таштап кетүүгө аргасыз болгон. Тель-Авив Израилдин түндүгүндөгү 80 миңдей жашоочу ушундай абалга туш болгонун билдирген.
Жаңжалдын андан ары курчушу 30-июлда Израилдин аскерлери Бейруттун түштүк четиндеги Харет Хрейк конушундагы турак жайга кол салып, имарат толугу менен талкалангандан кийин болгон. Андан жети киши, анын ичинде “Хезболланын” улук командири Фуад Шукр набыт болгон.
Август айында Хасан Насрулла Израиль “бардык кызыл сызыктарды кесип өткөнүн”, кол салууга жооп кайтарыларын айткан. Тель-Авив өз кезегинде жөөт мамлекетине каршы ар кандай агрессия Ливан үчүн масштабдуу кыйратуучу кесепеттерге алып келиши мүмкүн экенин эскерткен.
Ушул аптада, 17-18-сентябрда Ливандын ар кайсы аймактарында миңдеген пейджерлер жана рациялар жарылды. Расмий маалыматтар боюнча, 32 адам каза болуп, үч миңден ашууну жарадар болгон. Аппараттардын жарылуусуна эмне себеп болгону азырынча белгисиз. Бирок “Хезболла” жана Ливан бийликтери окуя үчүн Израилди айыптады. Тель-Авив муну ырастаган да, четке каккан да жок.

















