Бүгүн, 23-августта Ч.Айтматов атындагы кино үйүндө Оскар сыйлыгынын “Эң мыкты чет тилдеги тасма” номинациясына катыша турган тасма тандалып, кинорежиссер Руслан Акундун “Бейиш эненин таманында” аттуу тасмасы кыргыз маданиятын дүйнөлүк аренада таанытууга мүмкүнчүлүк алды.
Бул тууралуу Маданият, маалымат, спорт жана жаштар саясаты министрлигинен билдиришти.
Тасма психикалык өнүгүүсү 8 жаштагы баланын деңгээлинде калган өзгөчө инсан 35 жаштагы Адилдин 75 жаштагы апасы Райхан апанын айылдагы жашоосун, эне-баланын укмуштуу окуялар менен коштолгон Меккеге болгон сапарын баяндайт.
Тасма Кыргызстан, Өзбекстан, Казакстан, Түркия, Египет жана Меккеде тартылган.
97- Оскар сыйлык тапшыруу аземи 2025-жылдын 2-мартында АКШнын Лос- Анжелес шаарында өтөт.
“Оскар” сыйлыгынын “Эң мыкты чет тилдеги тасма” номинациясы (The Academy Award for Best Foreign Language Film) – жыл сайын АКШда негизделген Кинематографиялык искусство жана илимдер академиясы тарабынан ыйгарылат. Бул номинация негизинен чет тилдеги (англис тилинде эмес) башка мамлекеттердин толук метраждуу тасмаларына берилет.



















