Палестиналык ХАМАС кыймылынын Саясий бюросунун башчысы Исмаил Ханиянын өлүмү Газадагы ок атышпоо келишимин ого бетер кечеңдетти.
Бул тууралуу Кытайдын тышкы иштер министри Ван И египеттик кесиптеши Бадр Абдел Аты менен телефон аркылуу сүйлөшкөндө билдирди.
«ХАМАСтын Саясий бюросунун башчысы Исмаил Ханиянын Тегеранда өлүмү аймактагы кырдаалды ого бетер курчутту. Бул өлтүрүү БУУнун Уставынын негизги принциптерин бузат, Ирандын эгемендигине жана кадыр-баркына кол салып, бардык тараптардын тынчтыкка жетишүү аракеттерине олуттуу доо кетирет жана Газадагы ок атышууну токтотууну ого бетер кечеңдетүүдө. Биз буга чечкиндүү каршыбыз жана катуу айыптообузду билдиребиз», – деп анын сөзүн Кытайдын Тышкы иштер министрлиги келтирди.
Министрдин айтымында, өч алуу өч алууну пайда кылып, тунгуюк чөйрөгө алып барат, ал эми зордук-зомбулукту зомбулук менен ооздуктоо карама-каршылыктарды ого бетер курчутат.
“Газа чатагы боюнча кош стандарттар болбошу керек”, – деп баса белгиледи Ван И.
Египеттин тышкы иштер министри Бадр Абдель Аты өз кезегинде Ханиянын өлүмү аймакта кеңири масштабдуу согуштун чыгышына алып келиши мүмкүн экенин айтты.
“Египет Газадагы кырдаалдын курчушуна терең тынчсызданууда. Ханиянын өлүмү ок атышпоо келишимине жетишүүнү ого бетер кыйындатып, ал тургай аймакта кеңири масштабдуу согуштун чыгышына алып келиши мүмкүн. Аймак мындан ары согуштарды жана толкундоолорду башынан өткөрө албайт”, – деди Абдель Аты.
Буга чейин Кытайдын Тышкы иштер министрлигинин басма сөз катчысы Линь Цзянь Кытай Ханиянын өлтүрүлшүн кескин айыптарын билдирген.
ХАМАСтын лидери Исамил Хания 31-июлда Тегерандагы резиденциясында Израилдин соккусунан улам каза болгонун ХАМАС кабарлаган. Ал Иранга жаңы президенттин инаугурациясына катышуу үчүн келген. Кыймыл Ханиянын өлүмү үчүн Израиль менен АКШны айыптап, кол салуу жоопсуз калбасын билдирген.
Иран бийлиги да Ханиянын жок кылынышына Израилди күнөөлөп, бул үчүн Израиль катуу жооп аларын эскерткен.
Ошондон бери батыш маалымат каражаттары өз булактарына таянып, Иран Израилге сокк урушу ыктымал экенин жазышууда.


















