Израиль бийлигинин Газа тилкесиндеги Рафахтын калкын эвакуациялоону баштоо жөнүндө чечими анклавдын карапайым калкынын абалын начарлатат.
Бул тууралуу БУУнун жетекчисинин расмий өкүлү Стефан Дюжаррик брифингде билдирди.
“Рафахтагы тургундарды эвакуациялоо буйруктары карапайым калктын азап-кайгысын ого бетер күчөтөт”, – деди ал.
Дюжаррик БУУ эч кандай мажбурлап эвакуациялоо операцияларына катышпайт жана ички жер которгондор үчүн атайын аймактарды уюштурбай эле деп белгиледи.
Ал ошондой эле Рафахтагы кандайдыр бир аскерий операция анклавга гуманитардык жардам жеткирүү боюнча ансыз да алсыз операцияны оор чекке түртөт деп баса белгиледи.
Буга чейин Дүйнөлүк саламаттыкты сактоо уюмунун башчысы Тедрос Адханом Гебрейесус Израилдин коргонуу күчтөрүнүн Рафахка басып кириши гуманитардык кырдаалдын болуп көрбөгөндөй начарлашына алып келерин айткан.
Буга чейин Израиль армиясы Рафахтын калкын эвакуациялоого даярдык көрө баштаганын билдирип, шаардын чыгыш бөлүгүндөгү калкты аймакты таштап, Хан-Юнистеги гуманитардык зонасы кененирээк Аль-Мавасиге көчүүгө чакырган.
Бул максатта израилдик аскерлер Рафахтын чыгыш аймактарында эвакуацияга чакырган баракчаларды чачып, СМС билдирүүлөрдү жөнөтүп, жергиликтүү калкты телефон аркылуу кабардар кылып, видео билдирүүлөрдү таратып жатканын, армия билдирди.
Газада жарым жылдан ашык убакыттан бери уланып жаткан согуштук операцияга байланыштуу эл аралык коомчулук акыркы кезде Израилдин бийликтерине кысымды күчөтүп, анклавдагы согуштук аракеттерди тез арада токтотууну жана Рафахка аскерлерди жөнөтүү пландарынан баш тартууну талап кылууда.
Израилдин бийликтери Рафахтагы операция “толук жеңиш” жана Газа тилкесинде ХАМАСты жок кылуу үчүн зарыл деп ырастоодо.
Белгилей кетсек, 2023-жылдын 7-октябрында Палестина-Израиль жаңжалы башталгандан бери Газа тилкесинде кеминде 34 миң 735 киши набыт болуп, кеминде 78 миң 108 киши жаракат алды.


















