АКШнын Аскер-деңиз күчтөрүнө таандык USS Gerald R. Ford аскердик учактарды ташуучу кемесинде кир жуучу бөлмөдөгү өрттөн кийин, бир катар техникалык жана эксплуатациялык көйгөйлөр аныкталды. Бул тууралуу Bloomberg Пентагондун тиешелүү башкармалыгына таянып жазды.
Жакынкы Чыгышта Иранга каршы операцияга катышкан кеме окуядан кийин оңдоо үчүн Крит аралындагы Суда базасына жөнөтүлгөн. Ошол эле учурда Пентагондо кеменин согуштук даярдыгын жана негизги системаларынын ишенимдүүлүгүн так баалоо үчүн маалымат жетишсиз экенин билдиришкен.
Негизги көйгөйлөрдүн катарында учактарды электромагниттик учуруу системасы (EMALS) жана конуу үчүн аэрофинишерлердин ишенимсиздиги, ошондой эле радар комплекси жана курал-жарак жеткирүүчү лифттердеги мүчүлүштүктөр бар. Мындан тышкары, бул кеме узак убакыт бою үзгүлтүксүз учуп-конуу операцияларын жүргүзө алабы жана зыян келтирилген шартта согуштук жөндөмүн сактай алабы деген суроолор жаралууда.
Ошондой эле турмуш-тиричилик көйгөйү да чечиле элек — кемеде экипаждын толук курамы жана убактылуу кызматкерлер үчүн жетиштүү уктоочу орундар жок.
АКШнын Аскер-деңиз күчтөрүнүн расмий маалыматы боюнча, кир жуучу бөлмөдөгү өрт Жакынкы Чыгыштагы согуштук аракеттерге байланыштуу эмес. Окуянын кесепетинен эки деңизчи жабыркап, дагы ондогон экипаж мүчөлөрү көмүр кычкыл газынан ууланган. Америкалык командачылык өрт болгонго карабастан кеме өз милдеттерин кадимки режимде аткарууну улантканын белгиледи.















