Президент Садыр Жапаров бүгүн, 9-майда, кыргызстандыктарды Улуу Ата Мекендик согуштагы Жеңиш күнү менен куттуктады. Бул тууралуу президенттин басма сөз кызматынан билдиришти.
Мамлекет башчысы фашисттик баскынчыларга каршы Улуу Ата Мекендик согуш – бүткүл адамзаттын тагдырына таасир эткен тарыхый окуя экенин, ошондуктан 9-Май – Улуу Жеңиш күнүнүн мааниси зор экенин белгиледи.
“Адам чыдагыс кыйынчылыктар, ачарчылык коштогон азап-тозоктор менен дээрлик төрт жылга созулган согуштан кийинки улуу Жеңиштин келишине Кыргызстан да өзгөчө зор салым кошту.
Фашисттик Германия Советтер Союзуна кол салып, согуш жарыялагандан кийин Кыргызстан бир тууган боордош элдердей эле 360 миңден ашуун уул-кызын согушка аттандырган. Бул ошол кезде өлкөнүн ар бир төртүнчү жашоочусу согушка кеткен деген сөз. Мындан сырткары, 30 миңден ашык кыргызстандык өлкөдөн сырткаркы аскер өнөр жай ишканаларына жөнөтүлгөн.
Согуштун оор жылдарында оорукта калгандардын баары – кары дебей, жаш дебей күнү-түнү тыным албай эмгектенип, жеңиштин камсыз болушуна эбегейсиз жардам беришкен”, – деди президент.
Өлкө башчысы бул Жеңиш оңойго турбаганын, жүз миңдеген жарандар майдан талаасынан кайтпай калганын белгиледи.
“Биз жер жүзүндөгү бакубат жашоо үчүн кан майданда курман болгон мекендештерибизди эч качан унутпайбыз! Улуу Жеңишке жетүүдө кыргызстандыктардын салымы зор деп башыбызды бийик көтөрүп жүрөбүз. 150 миңден ашуун командирлер жана жоокерлер фашисттик баскынчылардын мизин кайтаргандагы баатырдыгы жана каармандыгы үчүн орден-медалдар менен сыйланганын, алардын арасында “Даңк” орденинин толук кавалерлери болгонун, жетимиштен ашуунуна Советтер Союзунун Баатыры наамы ыйгарылганын жыл сайын сыймыктануу менен белгилеп келебиз”,- деди Жапаров.
Мамлекет башчысы жылдан жылга кан күйгөн согушка катышкандардын, оорук эмгекчилеринин саны азайып баратканын айтып, эрдиги менен каармандыгы кылымдан-кылымга, муундан-муундарга үлгү катары айтыла берчү жалпы согуш ардагерлерин, оорук эмгекчилерин сыйлап алууга күч да, кудурет да, эрк да жетерин белгиледи.
Сөзүнүн аягында өлкө башчысы жергебизде тынчтыктын ыры жаңырып, молчулук, токчулук болуп, элибизди ынтымак ыроолоп, асманыбыз ар дайым ачык болушунун каалады.



















