Талибан кыймылы өлкөнүн жаңы жетекчилигине баш ийген 39 элчиликтин ишин уюштурганын Ооганстандын талиптер түзгөн убактылуу өкмөтүндөгү тышкы иштер министри Амир Хан Моттаки билдиргенин ТАСС агенттиги жазды.
«Учурда Ооганстандын ар кайсы өлкөлөрдөгү 39 дипломатиялык өкүлчүлүгү Ооганстан Ислам Эмиратына (Талибан колдонгон мамлекеттин аты – ред.) баш ийет», – деди Моттаки Кабулда өткөн басма сөз жыйынында, ведомствонун жыл ичиндеги ишинин жыйынтыгы менен тааныштырып жатып.
Ал Ооганстандын Тышкы иштер министрлигинин “аракетинин аркасында” Казакстан менен Кыргызстандын бийликтери Талибан кыймылын тыюу салынган уюмдардын тизмесинен чыгарганын баса белгиледи.
«Биздин дипломаттардын чет өлкөлөрдө таанылышы биздин саясатыбыздын жана стратегияларыбыздын натыйжалуулугун көрсөтүп жатат», – деп кошумчалады ал.
Ислам Эмиратынын сайтындагы билдирүүдө, Ооганстандын жаңы өкмөтүнүн дипломаттары бир жыл ичинде Иран, Казакстан, Катар, Кытай, Малайзия, Бириккен Араб Эмираттары, Пакистан, Россия, Түркмөнстан, Түркия жана Өзбекстанда аккредитациядан өтүшкөнү айтылат.
Өз кезегинде Ооганстанга кеминде 14 өлкөнүн расмий делегациялары, анын ичинде Египет, Катар, БАЭ, Россия жана Түркиядан, ошондой эле Евробиримдиктин жана башка эл аралык уюмдардын өкүлдөрү келишкен.
Өткөн жылы Тышкы иштер министрлиги Ооганстандын жарандарына 97 556 чет элдик паспорт берип, 426 141 паспорттун жарактуу мөөнөтүн узарткан. Мындан тышкары, Ооганстанга 41 959 чет элдик виза алган.
Эске салсак, сентябрдын башында Кыргызстан “Талибан” кыймылын террористтик уюмдардын тизмесинен чыгарганын КР Тышкы иштер министрлиги (ТИМ) расмий тастыктаган.
“Кыргыз Республикасынын Тышкы иштер министрлиги өлкөнүн компетенттүү мамлекеттик органдары кылдаттык менен карап чыгып, ар тараптуу баа бергенден кийин “Талибан” кыймылын Кыргыз Республикасынын аймагында тыюу салынган уюмдардын тизмесинен чыгаруу чечими кабыл алынганын тастыктайт. Бул чечим аймактык туруктуулукту бекемдөөгө жана диалогду улантууга багытталган. Кыргыз Республикасы Ооганстанда жана бүтүндөй аймакта туруктуу жана тынчтык чөйрөнү камсыз кылууга багытталган эл аралык коомчулуктун күч-аракеттерин колдоого умтулат”, – деп жазылган Тышкы иштер министрлигинин 6-сентябрда тараткан билдирүүсүндө.
5-сентябрда Ооганстандын Тышкы иштер министрлигинин сайтына Кыргызстандын чечимине ыраазычылык айткан билдирүү жарыяланган.
Коңшу Казакстанда “Талибан” тыюу салынган уюмдардын тизмесинен үстүбүздөгү жылдын июнь айында чыгарылган.



















