2-июнь күнү Улан-Батордо Монголиянын президенти Ухнаагийн Хурэлсух менен Түркмөнстандын президенти Сердар Бердымухамедовдун расмий сүйлөшүүлөрү өтүп, өлкөлөр ортосундагы кызматташтыкты кеңейтүү боюнча 14 документке кол коюшту.
Бул маалыматты TDX мамлекеттик маалымат агенттиги билдирди.
Президенттер Түркмөнстан менен Монголиянын ортосундагы акыркы 30 жылдагы мамилелердеги жетишкендиктерин, ошондой эле анын экономикалык бөлүгүнө басым жасоо менен жакынкы жылдарда эки тараптуу кызматташтыкты өнүктүрүүнүн келечегин жана артыкчылыктарын карашты.
Хурелсух Монголиянын Борбордук Азия өлкөлөрү, өзгөчө Түркмөнстан менен өнүгүп келе жаткан достук байланыштарын чыңдоого жана бардык тармактарда кызматташууну кеңейтүүгө жана өнүктүрүүгө умтуларын ырастады.
Монгол мамлекетинин башчысы өз ара мамлекеттик сапарлар эки өлкөнүн элдеринин ортосундагы достукту мындан ары да чыңдайт деген ишенимин билдирди.
Түркмөнстандын президенти Бердымухамедов Монголияга жасаган мамлекеттик сапарына канааттангандыгын билдирип, Хурелсухтун 2024-жылы Түркмөнстанга жасаган иш сапарынан кийин эки өлкөнүн кызматташтыгы көптөгөн тармактарда жанданганын баса белгиледи.
Лидерлер өткөн жылы Ашхабаддагы сүйлөшүүлөрдүн жүрүшүндө жетишилген макулдашуулар реалдуу түрдө иш жүзүнө аша баштаганын билдиришти.
Мындан тышкары, тараптар эки өлкөнүн өкмөттөрү менен уюмдарынын ортосундагы макулдашууларга жана эки тараптуу мамилелердин келишимдик-укуктук базасын мындан ары бекемдөөгө, ошондой эле соода-экономика, айыл чарба, жеңил өнөр жай, илим, билим берүү жана саламаттыкты сактоо тармактарында кызматташууну байытуу жана кеңейтүү боюнча макулдашышып, жыйынтыгында эки тараптуу кызматташтыкты кеңейтүү боюнча жалпысынан 14 документке кол коюшту.
Кызматташуу боюнча түркмөн-монгол өкмөттөр аралык комиссиясы эки өлкөнүн ортосундагы өз ара пайдалуу экономикалык кызматташтыкты колдоо механизмин түзүү максатында түзүлгөнү белгиленди.
Түркмөнстандын президенти Монголияны БУУнун деңизге чыгууга мүмкүнчүлүгү жок өнүгүп келе жаткан өлкөлөр боюнча үчүнчү конференциясына катышууга чакырды.
Форум август айында Каспий деңизинин түркмөн жээгинде, Авазада өтөт.


















