Түркиянын Улуттук билим берүү министрлиги тарых программасына өзгөртүүлөрдү киргизип жатат, анын алкагында «Борбор Азия» терминин «Түркстан» деп алмаштыруу пландалууда, деп билдирет TRT Haber.
Түркиянын президенти Режеп Тайып Эрдоган алдыдагы өзгөрүүлөрдү колдоп, түрк элдеринин биримдигинин маанилүүлүгүнө басым жасады. «Түрк кылымы» жөнүндөгү көз карашыбызды Түрк мамлекеттер уюмуна жайылтуу менен келе жаткан мезгилди түрктөрдүн доору кылуу үчүн ийиндеше иштешебиз»,-деди.
«Түрктөрдүн мекени» деген маанини билдирген Түркстан сөзү тарыхтын эң алгачкы доорлорунан бери эле колдонулуп келет. XIX кылымдын 2-жарымында орус баскынчылыгынын натыйжасында Түркстан деген аталыштын ордуна Орто Азия түшүнүгү киргизилип, тараган», – дейт профессор Ахмет Тасагил.
Доцент Рамин Садык дагы мындай деп кошумчалады: «Түркстан концепциясына жана аны Улуттук билим берүү министрлигинин окуу китептерине киргизүүгө кайрылуубуз абдан туура чечим. Түркия да, Түркстан да түрктөр басымдуулук кылган аймакты билдирет».
Эксперттер бул өзгөртүүлөр түрк дүйнөсүндөгү байланыштарды бекемдеп, орток тарых, адабият, карта жана алфавит түзүүгө шарт түзөрүн белгилешүүдө.


















