АКШнын Стамбулдагы башкы консулунун резиденциясында Орусия Федерациясы менен АКШнын өкүлдөрүнүн ортосунда элчиликтердин иштери боюнча сүйлөшүүлөр жүрүп жатат.
Бул тууралуу РИА Новости билдирди.
Орусиянын тышкы иштер министри Сергей Лавров жолугушууну жарыялап жатып, анын жыйынтыктары тараптардын көйгөйлүү маселелерди чечүүдө канчалык тез жана эффективдүү кадам таштай аларын түшүнүүгө мүмкүндүк берет деген үмүтүн билдирди.
Лавров ошондой эле талкууга жогорку деңгээлдеги дипломаттар жана эксперттер катышарын айтты.
Ал эми CNN Мамлекеттик департаменттин өкүлүнө шилтеме берүү менен сүйлөшүүлөрдө саясий же коопсуздук маселелери талкууланбай тургандыгын, ошондой эле “күн тартибинде кадр маселелери, виза, дипломатиялык банк операциялары жана башка уюштуруу маселелери бардыгын” билдирди.
Бул жолку жолугушууда Украина боюнча талкуу болбойт, ошондой эле саясат жана коопсуздук маселелери каралбайт.
Жолугушууга Орусиянын тышкы иштер министри Сергей Лавров жана Орусия президентинин жардамчысы Юрий Ушаков, АКШдан – мамлекеттик катчы Марко Рубио, президенттин улуттук коопсуздук боюнча жардамчысы Майкл Вальц жана Жакынкы Чыгыш боюнча атайын өкүл Стивен Виткофф катышты.
Бул жолугушууну президент Владимир Путин жогору баалап, каралган маселелер боюнча жылыштар бар экенин билдирди.
Бир күн мурда Орусиянын тышкы иштер министри Сергей Лавров Катарга болгон иш сапарынын соңунда маалымат жыйын өткөрүп, эки өлкөнүн дипломаттары 27-февралда Стамбулда жолугуп, “системалык көйгөйлөрдү” карап чыгышарын айткан.
18-февралда Сауд Арабиянын борбору Эр-Риядда эки өлкөнүн делегацияларынын биринчи жолугушуусу болуп, анын максаты – эки тараптуу мамилелерди өнүктүрүү жана Украинадагы жаңжалды токтотуу болгон.















