БИШКЕК, 15-март. — Eurasia Today. Кечээ, 15-мартта, Жалал-Абад шаардык мэриясынын кичи жыйындар залында “Финансылык сабаттуулук” аталышында окутуу өткөрүлдү.

Ага шаардык Эмгек, социалдык камсыздоо жана миграция башкармалыгынын жетекчиси Назира Жакыпова, тиешелүү мекеме-ишканалардын адистери жана шаар тургундары катышты.

Бул тууралуу муниципалитеттин маалымат кызматынан билдиришти.

Маалыматка ылайык, алгач аз камсыз болгон үй-бүлөлөрдү жакырчылыктан чыгаруу, аларга жагымдуу шарттарды түзүү боюнча адистер тарабынан жарандардын финансылык сабаттуулугун жогорулатуу, акча каражаттарын туура колдонуу, каржылык маселелерди түшүнүү боюнча маалыматтар айтылып, окутуу суроо-жооп менен улантылды.

Кыргызстанда социалдык келишимдин негизинде аз камсыз болгон үй-бүлөлөрдүн ишкердик баштоосу үчүн 100 миң сомдон гранттык акча каражаты берилип келүүдө. Быйыл аталган долбоордын алкагында Жалал-Абад шаарындагы жакыр жашаган 68 үй-бүлөгө берилмекчи.

Эске салсак, 2022-жылы Жалал-Абад шаарынан 50 үй-бүлө социалдык контракт долбооруна катышып, жеке ишкердигин баштаган.