АКШ менен Сауд Аравия жарандык өзөктүк энергетиканы өнүктүрүү боюнча алдын ала келишимге кол коюуга жакындады.
Бул тууралуу 13-апрелде Эр-Риядда иш сапары менен жүргөн АКШнын энергетика министри Крис Райт журналисттерге билдиргенин ISNA агенттиги жазды.
Анын алдында Райт Сауд Аравиянын энергетика министри, ханзаада Абдулазиз бин Салман менен жолугушкан.
Анын айтымында, тараптар америкалык компаниялардын Саудиянын өзөктүк өнөр жайын түзүүгө катышуусуна жол ача турган келишимге жетишүү жолунда турат. Кеп АКШнын 1954-жылдагы Атомдук энергия боюнча мыйзамынын 123-бөлүмү жөнүндө болуп жатат. Ал өзөктүк технологияны жайылтпоонун тогуз шартын карайт жана өзөктүк технологияны экспорттоо үчүн зарыл.
1954-жылдагы АКШнын Атомдук энергия боюнча мыйзамынын 123-бөлүмүндө АКШнын потенциалдуу өнөктөштөрү үчүн бир катар талаптар бар – Сауд Аравиясы азырынча буга макул боло элек.
Буга чейин бул сүйлөшүүлөрдөгү прогресс Сауд Аравиянын уранды байытуу же иштетилген өзөктүк отунду кайра иштетүү мүмкүнчүлүгүн жокко чыгарган келишимге кол коюуну каалабаганы тоскоолдук кылган.
Ошол эле учурда Райт АКШнын мурдагы президенти Жо Байдендин администрациясы каалаган Сауд Аравиясы менен кеңири келишим тууралуу сөз кылган жок.
Анда кеп Сауд Аравия менен АКШнын ортосундагы мамилелерди нормалдаштырууну камтыган үч тараптуу “пакет келишими” жөнүндө сөз болгон. Вашингтон Эр-Риядга коопсуздук кепилдигин жана жарандык өзөктүк технологиялар боюнча жардам берүүнү сунуш кылган, анын ордуна башка нерселер менен катар Израиль менен тынчтык келишимин түзүү болгон.
Министр катары биринчи иш сапары менен Сауд Аравияга барган Крис Райт Эр-Рияд менен Вашингтондун ортосундагы кызматташтык меморандумунун дагы кошумча деталдары ушул жылдын аягында бериле турганын айтты.
















