Тегеранда Иран Ислам Республикасынын, Россиянын жана Кытайдын дипломатиялык делегацияларынын үч тараптуу жолугушуусу өттү.
Бул тууралуу Tasnim агенттиги кабарлады.
“Шейшемби күнү биздин өлкөнүн Тышкы иштер министрлигинде Иран Ислам Республикасынын, Россиянын жана Кытайдын дипломатиялык делегацияларынын үч тараптуу жолугушуусу болуп өттү. Бул жолугушууда үч катышуучу өлкөнүн өкүлдөрү өзөктүк маселе боюнча сүйлөшүүлөрдүн акыркы абалын жана санкцияларды алып салуу маселесин талкуулашты”, – деп айтылат агенттиктин билдирүүсүндө.
Катышуучулар позицияларды жана аракеттерди координациялоо максатында тыгыз консультацияларды улантууга өздөрүнүн өкмөттөрүнүн олуттуу ниетин баса белгилешти жана үч өлкөнүн бул жолугушуулары жакынкы апталарда ар түрдүү дэңгээлдерде улантыла тургандыгына макулдашышты.
Мындан тышкары, Россия Федерациясынын жана Кытайдын делегация башчылары Ирандын тышкы иштер министринин саясий иштер боюнча орун басары жана Иран ТИМинин Тынчтык жана эл аралык коопсуздук департаментинин башкы директору менен да өзүнчө жолугушуулары болду.
Үч тараптуу жолугушуунун алдында Ирандын Тышкы иштер министрлигинин басма сөз катчысы Исмаил Багаи Биргелешкен комплекстүү иш-аракеттер планы (СВПД) же 2015-жылда түзүлгөн Ирандын өзөктүк келишими Россия менен Кытайдын катышуусунда кол коюлган жана бул өлкөлөр БУУнун Коопсуздук Кеңешинин алкагындагы ар кандай процессте роль ойной алышарын билдирген.
Анын айтымында, жайдын аягына чейин жаңы өзөктүк келишим түзүлбөсө, БУУнун республикага каршы санкциялары кайра киргизилиши мүмкүн.
Франция, Улуу Британия жана Германия Тегеранга чектөөлөрдү калыбына келтирүүгө даяр экенин эскертишкенин Reuters агенттиги билдирген. Багаи буга чейин бул маселе боюнча Иран 25-июнда Стамбулда “евроүчтүктүн” өлкөлөрү менен сүйлөшүүлөрдү өткөрөрүн билдирген.
Өзөктүк келишим (СВПД – Совместный всеобъемлющий план действий) – 2015-жылы Иран менен АКШ, Франция, Германия, Улуу Британия, Кытай, Россия өзөктүк келишимге кол коюшкан. Ага ылайык, Тегеран уран байытууну чектеп, буга жооп катары Иранга киргизилген экономикалык санкциялар алына баштаган. Бирок 2018-жылдын май айында Дональд Трамп президент болуп турганда АКШ келишиминен чыгып, Тегеранга каршы санкцияларды калыбына келтирген. Буга жооп катары Иран келишим боюнча милдеттенмелерин этап-этабы менен кыскартканын жарыялаган.















