Пакистан менен Ооганстан чек арачыларынын ортосунда катуу кагылышуу болуп, талиптер жоготууларга учураганы маалымдалды. Бул тууралуу Пакистандын аскердик мекемесине жакын айрым булактар билдиргенин “IRNA” агенттиги жазды.
Маалыматка караганда, ок атышуу Пакистандын түндүк-батышындагы Хайбер-Пахтунхва провинциясындагы “Куррам” чек ара бекетинде болгон. Бул жерде куралдуу кол салуулар жана террордук чабуулдар Пакистандын башка провинцияларына салыштырмалуу көп болуп турат.
Ок атуу ооган тараптан башталып, талиптер миномет жана артиллерия да колдонгон. Кагылышуунун натыйжасында пакистандык төрт чек арачы жараат алды.
Маалымат булактарынын билдиргенине караганда, Исламабаддын жооп иретиндеги соккусунда ооган тарапта да жоготууларга алып келген. Бирок Пакистандагы расмий булактар ооган тарап менен болгон чек ара чатагы боюнча азырынча комментарий бере элек.
Бул окуя Пакистандын аскердик делегациясынын Кандагарга пландалган сапары ооган талиптери тарабынан Пакистандын аба күчтөрүнүн алардын аймагына жасай турган чабуулуна жооп иретинде жокко чыгарылганы тууралуу кабарлардан бир күн өткөндөн кийин болду.
Ошол эле учурда айрым жергиликтүү маалымат булактары Пакистандын делегациясынын сапары ооган талиптеринин координациясы менен жылдырылганын, анткени Ооганстанда суу ташкындарынан улам оор кырдаал түзүлгөнүн жана азыркы тапта Талибан өкмөтүнүн бардык көңүлү кырдаалды жөнгө салууга бурулганын билдиришүүдө.
Эске салсак, бул Пакистан-ооган чек арасындагы биринчи окуя эмес. Алар талиптер бийликке келгенден кийин (2021-жылы) жанданган. Кийинчерээк эки өлкөнүн чек арасындагы кырдаал өткөн жылдын башында Исламабад пакистандык талиптерге каршы антитеррордук операция баштагандан кийин курчуп кеткен.



















