Малайзия блокадага алынган Газа тилкесинде ок атышпоону камсыз кылуу үчүн бейпилдик күчтөрүн жөнөтүүгө даяр.
Бул тууралуу Малайзиянын премьер-министри Анвар Ибрагим Х социалдык тармагындагы баракчасынан билдирди.
Малайзия өкмөтүнүн башчысы Индонезиянын жаңы шайланган президенти Прабово Субианто менен телефон аркылуу сүйлөшкөнүн, анда Газадагы кырдаалды талкуулаганын билдирди.
Ибрагимдин айтымында, эгер БУУ суранса алар Индонезия менен кызматташтыкта Газага тынчтык күчтөрүн жөнөтүүгө даяр.
Эске салсак, Малайзиянын премьер-министри Анвар Ибрагим былтыр октябрда Малайзия Израиль менен болгон жаңжалда Палестинаны колдоо үчүн бул өлкөгө куралдуу күчтөрүн жөнөтүүгө даяр экенин, бирок ал үчүн бул чечимди жаңжал чөлкөмүндөгү өлкөлөр колдошу керектигин билдирген.
Ал эми Индонезиянын учурдагы президенти Прабово Субианто июнь айынын башында Газадагы элдешүүнү көзөмөлдөө үчүн бейпилдик күчтөрүн жиберүүгө даяр экенин билдирген.
















