“Вашингтон Тибет маселеси Кытай үчүн өзгөчө маанилүү экенин түшүнүшү керек”.
Бул тууралуу Кытайдын Тышкы иштер министрлигинин өкүлү Лин Цзянь бейшемби күнү брифингде америкалык аткаминерлердин Индияда Кытайдан качып чыккан Далай-лама XIV Тензин Гьяцо менен жолугушуусуна комментарий берип жатып билдиргенин РИА Новости сайты жазды.
Буга чейин Reuters агенттиги Американын расмий өкүлдөрүнөн турган атайын делегация Индияда Далай-лама менен жолугушканын кабарлаган. Маалыматта Конгресстин Өкүлдөр палатасынын тышкы саясат боюнча комитетинин төрагасы Майкл Маккол жана Конгресстин мурдагы спикери Нэнси Пелоси кирген америкалык делегация Далай-лама менен Кытайды Тибет маселесин чечүүгө түрткөн жана АКШ президенти Жо Байден кол коюуну күткөн АКШнын мыйзам долбоорун талкуулай турганы айтылган.
Лин Цзянь Тибетке байланышкан маселелер Кытайдын ички иши жана тышкы күчтөрдүн эч кандай кийлигишпөөсү керектигин белгилейт.
“Биз Кошмо Штаттарын Тибетке байланышкан маселелердин өтө сезимтал экенин жана анын абдан маанилүүлүгүн толук түшүнүүгө жана Кытайдын негизги кызыкчылыктарын чын жүрөктөн урматтоого чакырабыз”, – деп кошумчалады дипломат.
Ал, “Сүргүндөгү Тибет өкмөтү” деп аталган уюм ачыктан-ачык сепаратисттик саясий топ жана алар Кытайдын конституциясын жана мыйзамдарын толугу менен бузган мыйзамсыз уюм”,-экенин белгиледи.
Лин Цзянь ошондой эле АКШны дүйнөгө “туура эмес сигналдарды” жибербөөгө жана Далай-лама менен мындан ары байланышпоого чакырды.
Reuters ошондой эле Далай-лама ушул аптада Америка Кошмо Штаттарына дарылануу үчүн барышы керек экенин жана анын Штаттарда америкалык расмий өкүлдөр менен жолугушуусу болоору же болбосу азырынча белгисиз экенин белгилеген.
Эске сала кетсек, Далай-лама XIV Тензин Гьяцо Кытай бийлигине каршы куралдуу көтөрүлүшкө чыгып, бирок анысы ийгиликсиз аяктагандан кийин 1959-жылы Тибеттен качып чыккан. Учурда ал өзүнүн тарапкерлери менен Индиянын Дхармсала шаарында жашайт. Бул жерде ал «Сүргүндөгү Тибет өкмөтү» коомун жетектеген. 2011-жылдын мартында Далай-лама ал уюмдун лидерлигинен кеткенин жарыялаган, бирок бул жол аркылуу уюм менен Пекиндин ортосундагы тирешти суута алган эмес.

















