Мамлекеттик мүлк фонду УКМКнын атайын операциясына каршылык көрсөткөн маалда жок кылынган кримтөбөл Камчы Көлбаевге тийиштүү алты автоунаа аукциондо сатылганын билдирди.
Алар:
– HYUNDAI GENESIS 2019 – 3 миллион 17,4 миң сом;
– TOYOTA LAND CRUISER PRADO 2005 – 1 миллион 498 миң сом;
– KIA RIO X-LINE 2019 – 1 миллион 241,2 миң сом;
– BMW X6 2021 – 7 миллион 661,2 миң сом;
– TOYOTA LAND CRUISER 100 2002 – 1 миллион 187,7 миң сом;
– ГАЗ-21 1965 – 481,5 миң сом.
Булардан жалпы алганда дээрлик 14 миллион сом мамлекеттин казынасына түштү.
Эми аукционго Көлбаевдин эң кымбат унаалары коюлат, алар:
– BMW Alphina XB7 (2021-ж.) – баштапкы баасы – 14,4 млн сом.
– Сооттолгон Mercedes Benz S600 (2015-ж.) – 4,9 млн сом.
Белгилей кетсек, атайын кызмат Көлбаевге тийиштүү делген жалпы наркы 1 миллиард долларлык активдер камакка алынганын, бир катар мүлкү конфискациаланганын билдирген. Алардын ичинде, коттеждер, кымбат баалуу клубдук үйлөр, курулуп жаткан имараттардагы көптөгөн батирлер, эс алуу борборлору, пансионаттар, ресторандар, жер тилкелери, ат сарайлар, аңчылык жерлер, 60тан ашык люкс автоунаа, зер буюмдар жана башкалар бар экени фактылар менен көрсөтүлгөн. Баса, Көлбаевдин таажысынын баасы эле 500 миң доллар экени айтылган.
Бийликтин кылмыштуу топторго каршы күрөшү коомчулуктун купулуна толуп турган чагы. Жыл жаңырар алдында УКМКнын төрагасы Камчыбек Ташиев бул күрөштүн алкагында мамлекеттин пайдасына 1 миллиард 200 миллион доллардан ашык каражат өндүрүлгөнүн ачыктаган.



















