Куткаруучулар Тибеттеги Эвересттин чыгыш капталында кар бороонунан улам камалып калган бардык туристтерди коопсуз жерге жеткиришти, — деп билдирет The Guardian жергиликтүү бийлик өкүлдөрүнө шилтеме жасап.
Ошондой эле жүздөгөн жергиликтүү жол көрсөтүүчүлөр жана топоз айдоочулар да куткарылды. Басылманын маалыматына караганда, бул окуя аймактагы эң ири издөө жана куткаруу операцияларынын бири болду.
Жекшемби күнү, 5-октябрда, дээрлик 1000ге жакын турист жана жергиликтүү тургундар Эвересттин чыгыш тарабында катуу кардын кесепетинен камалып калышкан. Куткаруу иштери деңиз деңгээлинен 4,9 миң метр бийиктикте жүргүзүлдү, анда кар жолдорду толугу менен жаап, туристтик лагерлерге өтүүнү тосуп койгон.
Кытайдын маалымат каражаттарынын билдирүүсүнө караганда, кар жаашы жума күнү, 3-октябрда башталып, ишембиге чейин уланган. Жергиликтүү бийлик жүздөгөн куткаруучуларды жана тургундарды кар үймөлөрүн тазалоого жиберген. Туристтердин бир бөлүгү жекшемби күнү эвакуацияланган.
Аба ырайынын начардыгына байланыштуу «Эверест» жаратылыш паркынын билеттерин сатуу жана кирүү убактылуу токтотулду.














