Түркиянын президенти Режеп Тайип Эрдоган жана католик чиркөөсүнүн башчысы Рим Папасы Лев XIV Анкарада биргелешкен маалымат жыйынын өткөрүштү. Анда Эрдоган Рим Папасынын сапары аймактык жана глобалдык контексттеги өтө маанилүү учурга туш келгендигин баса белгиледи. Бул тууралуу Anadolu агенттиги жазды.
Эрдоган билдиргендей, католик чиркөөсүнүн башчысынын Түркияга болгон сапары эки мамлекеттин ортосундагы достукка, кызматташтыкка жана өз ара түшүнүшүүгө негизделген көп жылдык мамилелерди чыңдоого салым кошот.
“Адамзат жаңы багытты издөөнү тездеткен, глобалдык деңгээлде белгисиздик күчөгөн жана Азиядан Африкага, Латын Америкасынан Чыгыш Европага чейин чыңалуу күчөгөн учурда болуп жаткан бул сапар бүткүл адамзатка пайда алып келет деп үмүттөнөм жана каалайм. Чынында эле, бүгүн жемиштүү эки тараптуу сүйлөшүүлөрдүн жүрүшүндө биз глобалдык тынчтыкты жана туруктуулукту орнотуу маселеси боюнча байкоолорубуз жана күтүүлөрүбүз менен бөлүштүк. Эки тараптуу мамилелерден тышкары, биз адамзаттын жалпы абийирине тиешелүү актуалдуу маселелерди талкууладык”,- деди Түркиянын мамлекет башчысы.
Анын айтуусунда, Түркия үч континенттин борборунда уникалдуу орунду ээлейт, Чыгыш менен Батышты байланыштырып, ар кандай маданияттар менен диндердин ортосундагы көпүрө катары кызмат кылат.
Ал эми Рим Папасы Лев XIV Түркиянын эл аралык аренадагы ролун жогору баалап, Эрдоганды Жер Ортолук деңизинин жана бүткүл дүйнөнүн азыркы жана келечектеги жашоосунда маанилүү ролу бар экендигин баса белгиледи.
Рим Папасы учурдагы геосаясий кырдаалга тынчсыздануусун дагы кошумчалады.
“Эки дүйнөлүк согуштан кийин биз экономикалык жана аскердик күч стратегиялары үстөмдүк кылган глобалдык деңгээлдеги жогорку чыңалуудагы мезгилге күбө болуп жатабыз”,- деди Рим Папасы.

















