Россия менен АКШнын жогорку даражалуу расмий өкүлдөрү бир нече жылдан бери биринчи жолу Сауд Аравиянын борбор шаары Эр-Риядда сүйлөшүүлөрдү өткөрүүдө. Жолугушуу Эр-Рияддагы Дирия сарайында өтүүдө.
Сүйлөшүүлөргө Россиянын тышкы иштер министри Сергей Лавров менен АКШнын мамлекеттик катчысы Марко Рубио катышууда. Жолугушууга ошондой эле Россия президентинин жардамчысы Юрий Ушаков, АКШнын улуттук коопсуздук боюнча кеңешчиси Майк Уолтц, АКШ президентинин Жакынкы Чыгыш боюнча атайын өкүлү Стив Уиткофф жана сүйлөшүүлөрдүн экономикалык аспектисине жооптуу Россиянын түз инвестициялык фондунун башчысы Кирилл Дмитриев да катышууда.
Сүйлөшүүлөргө Сауд Аравиянын өкүлдөрү да катышууда: тышкы иштер министри Фейсал бин Фархан Аль Сауд жана улуттук коопсуздук боюнча кеңешчиси Мусаид бин Мохаммед Аль-Айбан.
Россиянын Тышкы иштер министрлигинин расмий өкүлү Мария Захарова Эр-Рияддагы орус-америкалык сүйлөшүүлөрдүн биринчи этабы өтүп, азыр кыска тыныгуу жарыяланганын билдирди.
“Учурда кыска тыныгуу жарыяланды, андан соң тараптар сүйлөшүү процессин улантышат”, – деди ал.
Захарова Тышкы иштер министри Сергей Лавров иш-чарадан кийин прессага сүйлөй турганын кошумчалады.
Буга чейин маалымдалгандай, тараптар Москва менен Вашингтондун ортосундагы мамилелердин бардык спектрин калыбына келтирүүнү, ошондой эле Россия менен АКШ лидерлеринин саммитине даярдыктарды жана Украинадагы кырдаалды жөнгө салуу боюнча мүмкүн болгон сүйлөшүүлөрдү талкуулоону пландаштырууда.
Россия менен АКШнын делегацияларынын жолугушуусу президенттер Владимир Путин менен Дональд Трамптын телефондогу сүйлөшүүсүнөн бир нече күндөн кийин өтүп жатат. 12-февралдагы сүйлөшүүлөрдүн жыйынтыгы боюнча Трамп Путин менен Сауд Аравияда биринчи биргелешкен жолугушуусуна үмүт артарын билдирген.
Украинанын президенти Владимир Зеленский Сауд Арабиядагы украин өкүлдөрү АКШ менен Россиянын делегацияларынын жолугушуусуна катышпаганын билдирди. Бир күн мурун ал жерге Украинанын өкмөттүк делегациясы Зеленскийдин сапарына даярдык көрүү үчүн келген.















