Йемендик хуситтер (Ансар Аллах) Тель-Авивдеги “Бен Гурион” аэропортуна кайрадан сокку урушту. Чабуул коюуда “Зульфикар” баллистикалык ракетасы колдонулду.
Бул тууралуу “Ансар Аллах” тобунун куралдуу күчтөрүнүн өкүлү Яхья Сариа билдиргенин Saba агенттиги маалымдады.
Анын айтымында, бул аскердик операция өз максатына жетти. Сариа ракеталык соккунун натыйжасында 4 миллиондон ашуун киши баш калкалоочу жайларга баш калкалаганын, аэропорттун иши токтотулганын айтты.
Кыймылдын өкүлү ошондой эле Йемен Палестинага Газа тилкесине каршы агрессия токтотулуп, блокада жоюлмайынча аларды колдой турганын убада кылды.
Күн мурун Израилдин Коргоо күчтөрүнүн басма сөз кызматы аскерлер Йеменден атылган дагы бир ракетаны кармап алганын билдирген. Израилдин бир катар аймактарында абадан чабуул жасалганы тууралуу эскертүү жарыяланган.
Хуситтер “Бен Гурион” аэропортуна акыркы жолу 22-майда кол салышкан. Сариа анда да операция максатына жеткенин жана соккудан улам аэропорттун иши дээрлик бир саатка токтоп калганын ырастаган. Ошол эле күнү хуситтер Израилдин Яффа жана Хайфа шаарларындагы эки объектке учкучсуз учактар менен эки жолу сокку урган. Андан улам Израилдин аба күчтөрү Йемендин Сана эл аралык аэропортуна бир катар сокку урган.
4-майда да хуситтер “Бен Гурионго” сокку урган. Анын натыйжасында сегиз киши жеңил жана орточо жаракаттарды алышкан. Андан кийин Израил армиясы Сана аэропортундагы хусилердин инфраструктурасына чабуул жасашкан. Соккулардын алдында израилдик аскерлер Йемендин карапайым калкын араб тилинде аэропорттон жана анын айланасындагы аймактардан чыгып кетүүгө чакырышкан. Израилдин чабуулунан аэропортко келтирилген зыян болжол менен 500 миллион долларга бааланган.


















