Испания Газанын же Иордан дарыясынын Батыш жээгинин “мыйзамсыз аннексиясын” эч качан тааныбайт, деп билдирди королдуктун тышкы иштер министри Хосе Мануэль Альбарес.
“Евробиримдик өтө аз жана өтө кеч аракет көрдү… Биз Газа же Батыш жээктин мыйзамсыз аннексиясын тааныбайбыз”, – деп билдирди ал Onda Cero радиосуна берген маегинде.
Ал бул аймактарда калкты мажбурлап көчүрүү аркылуу басып кирүү болуп жатканын белгиледи.
Министрдин айтымында, Израиль “өтө оор кылмыштарды” жасап жатат, анын ичинде тамак алуу үчүн кезекте турган жайкын тургундарды өлтүрүү фактылары бар.
Альбарес Евробиримдикти жаңжалга өтө кеч жана алсыз реакция кылганы үчүн сынга алып, Испания ЕБ менен Израилдин ассоциация тууралуу келишимин токтотууну талап кылып жатканын эске салды.
Испаниянын ТИМ башчысы гуманитардык жардамды Газага жеткирүү үчүн бардык кургактыктагы өткөрмө пункттарды ачуу зарылдыгын белгилеп, абадан жардам таштоо чектелген натыйжа берерин, бирок адамдардын өмүрүн сактап кала аларын айтты.
Буга чейин 4-августта Газанын бийлиги Израиль 27-июлдан тартып палестиналыктарга жардамдын жарым-жартылай кайра жанданткандан бери анклавга болгону 674 жүк ташуучу машинаны киргизүүгө уруксат бергенин билдирген. Бул калктын муктаждыгынын 14% гана жабат.
Газанын администрациясынын маалыматы боюнча, элдин азык-түлүккө, керектүү буюмдарга, күйүүчү майга жана дары-дармекке болгон минималдуу муктаждыгын камсыз кылуу үчүн күнүнө болжол менен 600 жүк ташуучу машина кириши керек.
Израил өкмөтү 26-июлда эл аралык коомчулуктун басымынан кийин Газага абадан гуманитардык жардам таштоону кайра баштоо чечимин кабыл алган. Ошондой эле БУУнун конвойлору үчүн тамак-аш жана дары-дармек жеткирүүчү гуманитардык коридорлорду түзүү чечимин кабыл алган.
Андан бери бир катар араб жана Европа өлкөлөрү асмандан Газага бир нече таңгак гумжардам ташташты.
Газа тарап Израиль жарыялаган жеңилдиктерге карабай гуманитардык абал начар экенин, келген жардам дагы эле 2,4 миллион тургунга жетпей турганын билдиришүүдө.
















