Иран Ислам Республикасынын өкмөтүнүн расмий өкүлү Фатеме Мохаджерани Ирандын Сириядагы элчилигинин ишин кайра жандандыруу боюнча чечим Сирия Араб Республикасынын жаңы жетекчилигинин жүрүм-туруму жана аракеттерин эске алуу менен кабыл алынарын билдирди.
Мохаджерани апта сайын өткөрүлүүчү маалымат жыйында Иран азыркы саясий кырдаалга жана Сирияда аракеттенген саясий күчтөрдүн позициясына карап чечим кабыл аларын белгиледи.
“Учурда Сириядагы кырдаал белгисиз бойдон калууда”, – деп кошумчалады ал.
Иран өкмөтүнүн өкүлү ошондой эле кээ бир өлкөлөр Сирияга карата позициясын күтүүсүздөн кантип жана кандай максатта өзгөрткөнүнөн күмөн санап, Иран Ислам Республикасы Сирия бийлигинин аракеттеринин негизинде элчилигин калыбына келтирүү чечимин кабыл аларын баса белгиледи.
27-ноябрда Сириядагы куралдуу оппозиция өкмөттүк армиянын Алеппо жана Идлиб провинцияларындагы турумдарына каршы кеңири масштабдагы чабуулун баштаган. 7-декабрдын кечинде алар Алеппо, Хама, Дараа жана Хомсту басып алып, 8-декабрда Сириянын өкмөттүк күчтөрүнүн бөлүктөрү таштап кеткен Дамаскка киришкен. Башар Асад Сириянын президенттигинен баш тартып, өлкөдөн чыгып кеткен.
2024-жылдын январь айынан бери Идлиб провинциясында оппозиция тарабынан түзүлгөн Куткаруу өкмөтү деп аталган өкмөттү жетектеп келген Мохаммед аль-Башир 10-декабрда 2025-жылдын 1-мартына чейин созула турган өткөөл мезгилге Сирия өкмөтүнүн башчысы болуп дайындалганын жарыялаган.
8-декабрда Сириянын баш калаасында бийликти басып алган куралдуу топтордун өкүлдөрү тарабынан Дамасктагы Иран элчилиги тонолгону маалымдалган. Бирок кийинчирээк Ирандын Сириядагы элчиси Хоссейн Акбари бул маалыматты четке кагып, мындай жалган маалымат Израилдин тарапкерлери тарабынан таратылууда деп билдирген.















