Ирандын түштүк-батышындагы “Карун” атомдук электр станциясынын курулушунун биринчи этабы аяктады. Бул тууралуу Ирандын Атомдук энергия боюнча уюмунун (AEOI) башчысы Мохаммад Эслами Хузестан провинциясына болгон иш сапарында билдирди.
“Өткөн жылы Карун электр станциясын куруу үчүн белгиленген жерде биз аны куруу үчүн аянтчаны жабдый баштадык жана бүгүн биз биринчи этап – пайдубалды тургузуу үчүн топуракты даярдоо этабы аяктагандыгын билдиребиз”, – деди Эслами.
Анын айтымында, «Карун» АЭСинин кубаттуулугу 300 МВт болот.
Ирандык аткаминер курулуштун кийинки этабында заводдун пайдубалына бетон куюларын жана ал иштер күзүндө аякташы мүмкүн экенин кошумчалады.
Иран кубаттуулугу кеминде 300 МВт болгон жаңы “Карун” атомдук электр станциясын кура баштаганын өлкөнүн Атомдук энергия боюнча уюмунун (AEOI) башчысы 2023-жылдын 25-октябрында жар салган.
2023-жылдын 19-июлунда Ирандын “Press TV” каналы Эсламиге шилтеме берип, Иран 2041-жылга чейин жээк тилкесинде беш атомдук электр станциясын курууну пландап жатканын кабарлаган. Анда Ирандын Атомдук энергия боюнча уюмунун башчысы электр станцияларын куруу үчүн беш жер аныкталганын жана долбоорго даярдык көрүү боюнча алгачкы кадамдар жасалганын билдирген.
Учурда Иранда Россиянын катышуусу менен курулуп жаткан бир гана атомдук электр станция бар. Ал “Бушер” АЭСи.

Атомдук электр станциянын биринчи блогу республиканын улуттук энергетика системасына 2011-жылдын сентябрында кошулган. Учурда экинчи блоктун курулушу жүрүп жатат жана үчүнчү энергоблокту курууга келишим түзүлгөн. №2 блоктун курулушу расмий түрдө 2019-жылдын күзүндө башталган.
2021-жылдын аягында Мохаммад Эслами №3 блоктун участогунда пайдубалды бетондоо үчүн топуракты бекемдөө иштери жүрүп жатканын билдирген. “Бушер” АЭСинин №2 жана №3 блокторун куруу долбоору он жылга эсептелген.
“Бушер” АЭСинин №1 блогу ишке киргенден бери Ирандын энергетика системасына бир нече ондогон миллиард киловатт-саат электр энергиясын берип, өлкөгө бир нече ондогон миллион тонна парник газдарынын чыгышына жол бербөөгө мүмкүндүк берди.

















